Zëvendëskryeministri Bekim Sali tha se garantojnë që Ligji për përfaqësim të drejtë do të respektohet, pavarësisht se propozimi nuk parasheh masa ndëshkuese. Ai shtoi se ligji do të shoqërohet me mekanizma konkretë për implementim, përmes akteve nënligjore që do të miratohen sipas nevojës në të ardhmen, transmeton Portalb.mk.
“Jemi garantues se ligji për përfaqësim të drejtë do të respektohet dhe përfaqësimi i drejtë dhe adekuat do të implementohet në sistemin administrativ të këtij shteti. Natyrisht ligji parasheh formimin ose krijimin e akteve nënligjore, me të cilat në raste të nevojës do të mund të miratohen dhe në bazë të asaj të veprohet në të ardhmen. E dini se në ligj është paraparë formimi i një trupi koordinativ, të cilin do ta udhëheqë zv.kryeministri i parë i qeverisë dhe aty do të jenë të kyçur edhe më tepër ministra. Kështu që niveli më i lartë i udhëheqësisë shtetërore do të jetë i kyçur në implementimin e kësaj politike. Kështu që mbetet pas miratimit të ligjit ta ndjekim dhe të përcjellim se si do të zhvillohet politika e tillë”, tha Sali.
