Londër
Katari do të investojë 1.26 miliardë dollarë në teknologjinë klimatike në Britani të Madhe në kuadër të partneritetit historik për energjinë e pastër midis Londrës dhe Dohas, transmeton Anadolu.
Sipas njoftimit nga qeveria e Mbretërisë së Bashkuar, partneriteti i ri midis dy vendeve pritet të krijojë mijëra vende pune shumë të kualifikuara në të gjithë Mbretërinë e Bashkuar dhe në Doha, pasi Katari do të investojë 1 miliard funta (1.26 miliardë dollarë) në teknologjinë klimatike në vend, e cila përshpejton zhvillimin e teknologjive miqësore me klimën.
Qeveria britanike tha se gjiganti inxhinierik britanik “Rolls-Royce” do të përfitojë nga investimet në projektet që mbështesin tranzicionin e energjisë së pastër. Kompania britanike do të shohë investime në “start-up” në të dy vendet duke u fokusuar në efiçencën e energjisë, menaxhimin e karbonit dhe energjinë e gjelbër.
Kjo vjen gjatë vizitës shtetërore dy-ditore të Emirit të Katarit, Sheikh Tamim bin Hamad Al Thani në Britani.
“Ne po përmbushim premtimin tonë për ta bërë zhvillimin prioritetin tonë numër një, duke rritur partneritetet tona me partnerë të tjerë largpamës për të investuar në industrinë e Mbretërisë së Bashkuar dhe për të krijuar mijëra vende pune me aftësi të larta në industritë e së ardhmes”, tha kryeministri britanik, Keir Starmer.
Kryeministri i Katarit, Mohammed bin Abdulrahman Al Thani, nga ana e tij, e quajti nismën e re një “partneritet novator”, duke theksuar se bashkëpunimi i ri përputhet me strategjinë e tyre afatgjate për të investuar në ekonomitë e së ardhmes.
“Ky partneritet i ri forcon më tej pozicionin e Katarit si një investitor kryesor global në teknologjitë klimatike”, shtoi ai.
