Një lajm i hidhur ka tronditur sot mbarë opinionin në Komunën e Bërvenicës dhe më gjerë. Kryetari i kësaj komune, Jovica Ilievski, ka ndërruar jetë papritmas, duke lënë pas vete një zbrazëti të madhe në familje, por edhe në institucionin që udhëhiqte.
Përtej dhimbjes dhe situatës së rëndë emotive, qytetarët tashmë kanë filluar të pyesin se çfarë do të ndodhë me funksionimin e institucionit të komunës. Pas kësaj ngjarjeje tragjike, ligji në Maqedoninë e Veriut specifikon qartë hapat administrative që duhet të ndërmerren për të mos bllokuar proceset institucionale:
Seancë urgjente për zgjedhjen e u.d. kryetarit
Menjëherë pas përfundimit të ditëve të zisë, Këshilli i Komunës së Bërvenicës duhet të mblidhet në një seancë të jashtëzakonshme. Sipas Ligjit për Vetëqeverisje Lokale, këshilltarët komunalë do të duhet të votojnë me shumicë votash një nga anëtarët e Këshillit, i cili do të ushtrojë detyrën e kryetarit të komunës (u.d.).
Ky person do të udhëheqë komunën përkohësisht që shërbimet ndaj qytetarëve, rrogat e administratës dhe projektet në teren të vazhdojnë pa ndërprerje.
Shpallja e zgjedhjeve të parakohshme
Meqenëse mandati i kryetarit të ndjerë ka ndërprerë në një periudhë ku ligji detyron organizimin e zgjedhjeve të reja, pas njoftimit zyrtar të Ministrisë së Vetëqeverisjes Lokale dhe Qeverisë, Kryetari i Parlamentit do të duhet të shpallë zgjedhje të parakohshme lokale vetëm për Komunën e Bërvenicës.
Në këto zgjedhje, të cilat do të organizohen nga KSHZ-ja, banorët e Bërvenicës do të votojnë për kryetarin e ri, i cili do të ketë mandat legjitim për të udhëhequr komunën.
