Kryetari i LSDM-së, Venko Filipçe, ka kritikuar ashpër vendimin e Qeverisë për uljen e çmimeve të materialeve shkollore me 15%, duke e cilësuar këtë masë si “plotësisht manipuluese” dhe të pashoqëruar me ndikim real në jetën e qytetarëve.
Në një intervistë televizive, Filipçe deklaroi se analizat e bëra nga partia që ai drejton tregojnë një realitet krejt tjetër nga ai që prezantohet nga përfaqësuesit e qeverisë.
“Fletoret A4 për fëmijë janë shtrenjtuar me 30% krahasuar me fillimin e vitit. Çantat e shpinës janë dyfishuar në çmim. Tani vjen Qeveria dhe thotë se po i ul me 15% – kjo është thjesht një përpjekje për manipulim,” theksoi ai.
Sipas Filipçes, masa është jo vetëm e vonuar, por edhe pa asnjë efekt real në xhepat e qytetarëve.
“Qeveria nuk ndërmori asgjë më parë, dhe tani, kur çmimet janë tashmë të larta, përpiqet të justifikohet me një masë të pakuptimtë. Qytetarët do të paguajnë përsëri shtrenjtë dhe nuk do të ndiejnë asnjë lehtësim,” shtoi ai.
Filipçe gjithashtu kritikoi stilin e shpenzimeve të qeverisë aktuale, duke e quajtur atë të shkëputur nga realiteti me të cilin përballen qytetarët.
“Në kohën tonë, askush nuk fluturonte me klas biznesi. Nëse ndodhte rastësisht, personi dorëhiqej menjëherë. Sot, gjithë qeveria fluturon në klasë biznes. Nuk porosisnim mango, papaja apo mish viçi në restorantin qeveritar – kishte ushqime të zakonshme,” u shpreh Filipçe.
Ai theksoi kontrastin e madh midis mënyrës se si trajtohen fondet publike sot dhe ndjeshmërisë që, sipas tij, kishte qeverisja e mëparshme ndaj vështirësive të qytetarëve.
