Kryeministri në detyrë i Kosovës, Albin Kurti nuk komentoi dorëheqjen e ministrit të Mjedisit Planifikimi Hapësinor dhe Infrastrukturës, Liburn Aliu.
Teksa po merrte pjesë në homazhe pranë Monumentit të Personave të Zhdukur, Kurti u pyet nga gazetarët rreth qëndrimit të Liburn Aliut dhe dorëheqjes së tij pas zgjedhjes së Dimal Bashës si kryeparlamentar, transmeton KosovaPress.
Kurti shkurtimisht tha se nuk është as momenti dhe as vendi i duhur për të komentuar këtë çështje.
“Nuk është as vendi, as dita për këtë”, tha shkurtimisht Kurti para mediave.
Kujtojmë se Liburn Aliu dha dorëheqje pas zgjedhjes së Dimal Bashës si kryetar i Kuvendit të Kosovës.
Basha u zgjodh si kryeparlamentar në tentimin e 58-të të konstituimit të Kuvendit, ku mori besimin e 73 deputetëve.
Aliu u shpreh i zhgënjyer me zgjedhjen e Dimal Bashës si kryetar i Kuvendit të Kosovës. Sipas tij, zgjedhja Bashës nuk është “në frymën e në lartësinë e atij ideali për Republikën që ka qenë dhe mbetet arsye angazhimi për mua”.
“Dua t’ju njoftoj që sapo e dorëzova te Kryeministri i Republikës së Kosovës, z. Albin Kurti, letrën e dorëheqjes sime nga detyra e Ministrit në Ministrinë e Mjedisit, Planifikimit Hapësinor dhe Infrastrukturës. Dorëheqja ime vjen pas zgjedhjes së djeshme të kryetarit te Kuvendit të Republikës së Kosovës. Dje, pas votimit te kryetarit të Kuvendit, e kam njoftuar Kryeministrin Kurti për vendimin tim”, u shpreh Aliu në Facebook.
Ndryshe konstituimi i Kuvendit ka ngecur në pikën e katërt të rendit të ditës, aty ku duhet të caktohet nënkryetari i Kuvendit nga radhët e komunitetit serb.
