Kryetarja e Forumit të Gruas të Alternativës, Albulena Demiri Zendeli, gjatë promovimit të kandidatit të VLEN për komunën e Kërçovës, Fatmir Limani, ka folur për rëndësinë që i kanë kushtuar gruas në këto zgjedhje lokale, pikërisht në Kërcovë.
Ajo ka theksuar se për herë të parë Forumit të Gruas i jepet bartësi i listës nga Koalicioni VLEN, pa e kërkuar.
“ Ky nuk është një promovim i një kandidati. Ky është një hap i guximshëm drejtë një politike të re. Duke pasur vizion, Forumit të Gruas, për herë të parë i jepet e drejta për të zgjedhur bartësin e listës zgjedhore. Dhe ne me krenari kemi zgjedhur që bartëse e saj të jetë një grua. Ky akt nuk është vetëm një simbol, një deklaratë force. Koha kur gratë ishin të lënë në periferi ka marr fund. Ne nuk kërkojmë më leje për të qenë pjesë, ne po marrim vendin që na takon. Por, ka edhe një tjetër mesazh që dua ta theksoj përvoja e kulturës në politikë. Politika pa kulturë është si një trup pa shpirt. Kultura është ajo që na lidh me rrënjët, që na mbron nga padrejtësitë dhe që na kujton se pushteti nuk është për të sunduar por për të shërbyer. Një politikë me kulturë është politikë që dëgjon, respekton dhe bashkon, është politikë që nuk sheh vetëm mandate, por sheh breza të tërë që duhet të jetojnë me gjurmët e vendimeve tona. Ne jemi këtu për ta bërë ndryshimin të prekshëm. Jo vetëm për sot, por për nesër, për dekadat që vijnë, për brezat që do të na kujtojnë me krenari se kemi marr vendime të guximshme. Kërçova ka nevojë për këtë frymë të re. Për politikë që bashkon burrat e gratë, të rinjtë e të moshuarit, qytetin dhe fshatin, të gjithë rreth një vizioni të përbashkët”, theksoi midis tjerash Albulena Demiri Zendeli.
