Lideri i njërit prej subjekteve përbërëse të koalicionit VLEN, Bilall Kasami, në një intervistë për emisionin “360 shkallë” në MRT 1, deklaroi se votat në zgjedhjet e fundit janë fituar si koalicion dhe jo për shkak të ndonjë individi të vetëm.
I pyetur nëse ndonjë pjesë e elektoratit ka votuar për VLEN-in për shkak të pranisë së Arben Taravarit në këtë koalicion, Kasami u përgjigj:
“Jo, nuk ka votuar. Sepse ne vlerësojmë, dhe këtë e konfirmojnë edhe anketat e fundit që i kemi marrë nga institucione relevante, se për dallim nga ‘Fronti Evropian’, VLEN tashmë ka fituar një identitet të vetin”.
Sipas tij, në anketat ku qytetarëve u është dhënë mundësia të përgjigjen lirshëm për cilën parti do të votonin, pa listë të mbyllur, VLEN dallohet nga “Fronti Evropian” për faktin që nuk përfaqësohet vetëm nga një subjekt.
“Për dallim nga Fronti ku del vetëm emri i BDI-së, tek VLEN gjysma e të anketuarve shprehen si përkrahës të VLEN-it si koalicion, dhe më pas vijnë partitë veç e veç. Vlera e partive në VLEN është vetë koalicioni – ai që është brenda, ka peshë. Ai që largohet, nuk ka më peshë. Dhe kjo do të reflektohet edhe në zgjedhjet e ardhshme,” theksoi Kasami.
