Në javët e fundit, dinamika e re në skenën politike shqiptare, veçanërisht brenda koalicionit VLEN, ka marrë një kthesë të papritur. Para disa ditësh, Arben Taravari deklaroi publikisht se ka kanale komunikimi me BDI-në, duke lënë të kuptohet se një marrëveshje me këtë parti është në prag.
Por pse ndodhi kjo pikërisht tani?
Para disa javësh, një tender i dyshimtë për Parkingun në kate në Qendrën Klinike Universitare ngjalli dyshime. Gjithashtu, një aksion i madh i MPB-së në një fabrikë të marihuanës në Gostivar zbuloi se kjo fabrikë operonte me leje nga Ministria e Shëndetësisë, pa përmendur emra konkretë. Situata kulmoi kur drejtori i Geriatrisë, Muhsin Arifi, nga radhët e ASH-së së Taravarit, u kap nga MPB-ja duke kërkuar ryshfet prej 20 mijë eurosh, me dyshime se shuma mund të arrinte deri në 100 mijë euro.
Pas këtyre ngjarjeve, duket se Taravari humbi kontrollin dhe filloi të godasë koalicionin VLEN. Në mbledhjen e kryesisë së ASH-së, u vendos që partia të dalë e vetme në zgjedhje. Vetë Taravari theksoi se nuk ka problem të bashkëpunojë me BDI-në, çka çoi në reagimin e menjëhershëm të koalicionit VLEN, i cili e konsideroi këtë si vetëpërjashtim të Taravarit nga koalicioni.
Sot, reagimet e aktivistëve të Aleancës ishin të ashpra. Ata akuzuan Taravarin se mori votat në emër të VLEN-it dhe tani kërkon bashkëpunim me ata që, sipas tyre, kanë degraduar shqiptarët dhe janë futur në listat e zeza amerikane për ndikim rus dhe korrupsion masiv.
Një gjë është e sigurt: sot, Taravari ndoshta nënshkroi pensionimin e tij politik, pasi shqiptarët nuk tolerojnë lojën me dinjitetin e tyre.
