Ministri për Transformim Digjital, Stefan Andonovski, në “Studio 10” në Televizionin 24, foli për ndryshimet e reja në ligjin për Komunikimet Elektronike, në të cilin është paraparë ndalimi i lojërave të fatit online të paligjshme.
Përpjekjet e Ministrit të Transformimit Digjital, Stefan Andonovski, për të ndaluar lojërat e fatit online të paligjshme në Maqedoninë e Veriut, janë në përputhje me zotimet e koalicionit VLEN, i cili ka theksuar mbylljen e kazinove online si një nga prioritetet e tij kryesore gjatë fushatës zgjedhore.
Një nga figurat kryesore të koalicionit, Zëvendëskryeministri i parë i Maqedonisë së Veriut, Izet Mexhiti, ka deklaruar se një nga objektivat e tij kryesore është mbyllja e kazinove online që veprojnë pa licencë dhe që janë të pranishme në tregun maqedonas pa respektuar ligjet e vendit. Ai ka theksuar se janë të nevojshme veprime të forta për të parandaluar rritjen e këtyre lojërave të fatit dhe për të mbrojtur veçanërisht të rinjtë, të cilët janë më të prirur për të rënë viktimë e tyre.
Në këtë kuadër, nisma për ndryshimin e ligjit për Komunikimet Elektronike që po promovon Andonovski, duke e ndaluar lojërat e fatit online të paligjshme, është një reflektim i angazhimit të qeverisë për të realizuar një nga zotimet kryesore të koalicionit VLEN. Ky është një hap konkret për t’iu përgjigjur shqetësimeve për abuzimin me të dhënat personale dhe për pasojat që këto lojëra të paligjshme mund të kenë për shëndetin mendor dhe financiar të qytetarëve.
Në këtë kontekst, Izet Mexhiti në vazhdimësi kishte deklaruar se ka qenë një nga mbështetësit më të fortë të ndryshimeve ligjore dhe se do të vazhdojë të punojë në këtë drejtim, duke u angazhuar që të mbyllen kazinot online dhe të vendoset një rregullim më i fortë për lojërat e fatit, duke pasur parasysh rrezikun që ato paraqesin për shoqërinë.
Këto masa për mbylljen e kazinove online përbëjnë një pjesë të rëndësishme të platformës elektorale të koalicionit VLEN, i cili është angazhuar të mbrojë qytetarët dhe të sigurojë një ambient më të sigurt dhe më të shëndetshëm për të gjithë.
