Sindikatat e punonjësve të Ndërmarrjes së Qarkullimit Publik ndërprenë grevën. Autobusët do të kthehen në qarkullim. Ky vendim i sindikatave erdhi pas miratimit të subvencioneve për NQP-në në tentimin e dytë të Këshillit të Qytetit të Shkupit. Subvencionet për vitin 2024 kapin vlerën prej 11 milionë euro. Paraprakisht në mbledhjen e jashtëzakonshme të Këshillit nuk kishte vota të mjaftueshme për miratimin. Autobusët e transportit publik që nga ora 9 e mëngjesit nuk ishin në qarkullim për shkak të vendimin të sindikatës për grevë. Punonjësit nuk kanë marrë pagën e dhjetorit, ndërsa u ankuan se përballen me kushte të rënda financiare.
“Duam t’u tregojmë shfrytëzuesve të shërbimeve tona, qytetarëve të Shkupit se nga nesër duke filluar nga ora 4 e 45 transporti publik i qytetit do të vazhdojë funksionimin normal, siç ka funksionuar edhe ditëve të kaluara”, tha Miço Stojanovski, Sindikata e NQP-së.
