LSDM-ja do ta mbështesë interpelancën ndaj kreut të Kuvendit Afrim Gashi, e cila do të shqyrtohet në seancë parlamentare nesër. Nga grupi parlamentar i partisë së Venko Filipçes numërojnë disa nga arsyet, si skandalin ne aeroportin e Shkupit dhe rastin e dasmës me veturë zyrtare.
“Qëndrimi im personal është që interpelanca duhet të mbështetet. Janë bërë shumë lëshime për të cilat ne ishim ata që e informuan opinionin. Jo vetëm ne por edhe disa institucione dolën dhe konstatuan disa shkelje sa i takon rregullave të sjelljes së funksionarëve”, tha Venko Filipce, kryetar i LSDM-së.
Interpelancën nuk do ta mbështesë VMRO-DPMNE-ja dhe koalicioni. Sipas kryeministrit Hristijan Mickoski, nuk ka asnjë arsye për këtë nismë.
“Kjo është sjellje papjekurie madje edhe idiote e koalicionit LSDM, BDI dhe E Majta. Absolutisht nuk ka asnjë bazë për interpelancë ndaj kreut të Kuvendit Gashi dhe ne nuk do ta mbështesim atë iniciativë. Ka shumë argumente se përse nuk duhet ta bëjmë këtë. Dallimi në udhëheqjen e shtetit mes kësaj qeverie dhe qeverisë së drejtuar nga LSDM-ja dhe BDI-ja është i lartë”, u shpreh Hristijan Mickoski, kryetar i VMRO-DPMNE-së.
Nisma për interpelancë ndaj kreut të Kuvendit Afrim Gashi është e Të Majtës dhe kreut të saj Dimitar Apasiev. Sipas pozicioneve aktuale të deputetëve, nuk ka gjasa që ajo të miratohet megjithatë partitë që e mbështesin atë, thonë se do t’i elaborojnë argumentet në seancë. /Alsat.mk
