Kryeministri i Kosovës, Albin Kurti, i shoqëruar nga ministri për Komunitete dhe Kthim, Nenad Rašić dhe ministri i Administrimit të Pushtetit Lokal, Elbert Krasniqi, ka takuar në Prishtinë nënkryetaren e Komunës së Mitrovicës së Veriut, Katarina Ađančić, nënkryetaren e Komunës së Zveçanit, Nataša Tomanić dhe nënkryetaren e Komunës së Leposaviqit, Marina Bogojević, transmeton Anadolu.
Siç njofton Zyra e Kryeministrit, në këtë takim që vjen pas vizitës dhe takimeve të shumta në Berlin lidhur me anëtarësimin e Kosovës në Këshillin e Evropës, Kurti diskutoi me tre nënkryetaret e komunave mbi nevojat për shërbimet komunale që mund të ushtrohen të bashkërenduara në kuptim të lirisë së asociimit të komunave.
“Nënkryetaret Ađančić, Tomanić dhe Bogojević thanë se e shohin anëtarësimin e Kosovës në Këshillin e Evropës si një hap të rëndësishëm për fuqizimin e komunave të tyre dhe se një qëndrim të tillë do ta shprehin edhe në takime me përfaqësuesit diplomatik të shteteve të QUINT-it”, thuhet në njoftim.
Kryeministri Kurti shprehu mirënjohjen e tij ndaj nënkryetareve të Mitrovicës së Veriut, Zveçanit dhe Leposaviqit për punën e tyre të përditshme dhe kurajën për t’u shërbyer qytetarëve.
Ky ishte takimi i dytë në më pak se dy javë që kryeministri Kurti ka pasur me tre nënkryetaret e komunave veriore.
