Shi i bollshëm goditi sot qytetin më të madh turk, Stambollin, ku rrugët u shndërruan në liqene dhe automjetet mbetën të bllokuara në ujërat e rritura. Për shkak të shiut të fortë, u përmbyt një nënkalim në lagjen Kaynarca, nga ku ekipe të ndihmës së shpejtë shpëtuan një shofer dhe një fëmijë që ishin të bllokuar në makinë. Mediat turke publikuan një video ku shihet se si uji i shiut derdhet nga rruga në nënkalim si një ujëvarë.
Shiu filloi të bjerë në Stamboll gjatë natës dhe u intensifikua në mëngjes, sipas CNN Türk, e cila raportoi se për shkak të reshjeve u krijuan trafik të rënda në shumë pjesë të qytetit, si në anën evropiane ashtu edhe në atë aziatike.
Sipas hartës së trafikut të Bashkisë së Stambollit, ngarkesa e trafikut në qytet arriti 80 për qind. Në anën aziatike ajo ishte 89 për qind, ndërsa në anën evropiane 71 për qind.
Televizioni TRT Haber raportoi se për shkak të stuhisë dhe reshjeve të bollshme, Bosfori mori dy ngjyra pas turbullimit të ujit nga balta. Qendra e koordinimit të katastrofave informoi për erëra të forta veriore dhe rënie të temperaturës së ajrit me 12 gradë.
Sipas të dhënave të mëngjesit, shiu më i madh ra në lagjen Darlık, në rrethin Şile, ku u matën 83,9 kilogramë ujë për metër katror. Pritet që reshjet që prekën zonën e Bosforit në orët e ardhshme të intensifikohen në pjesën evropiane të Stambollit dhe më pas gradualisht të dobësohen.
Në terren janë shpërndarë më shumë se 8.000 persona në ekipe, të cilët vazhdojnë të punojnë për eliminimin e pasojave të mundshme të stuhisë dhe reshjeve të bollshme që goditën të gjithë qytetin, ndërsa në punë u ndihmojnë edhe rreth 2.400 automjete.
Stambolli ishte goditur tashmë nga përmbytje më 14 tetor, kur për shkak të sasisë së madhe të shiut vdiqën gjashtë persona.
