Tensionet dhe përplasjet e brendshme në BDI po shfaqen gjithnjë e më shumë edhe në publik. Këtë herë, debati është zhvendosur në rrjetet sociale, ku analisti Sefer Selimi ka kritikuar publikisht Artan Grubin, ndërsa ndaj tij ka reaguar Artin Spahiu, i afërt me ish-zëvendëskryeministrin e parë, shkruan portali plusinfo.mk.
Selimi, i cili prej vitesh njihet për qëndrimet në mbështetje të politikave të BDI-së dhe afërsinë me nënkryetarin aktual të partisë, Bujar Osmanin, ka deklaruar se problemet e Artan Grubit me drejtësinë janë çështje personale dhe nuk duhet të paraqiten si probleme të shqiptarëve.
Në statusin e tij, Selimi thekson se shqiptarët nuk e kanë hallin e Grubit dhe se ky i fundit nuk mund ta diktojë më politikën shqiptare në Maqedoninë e Veriut duke e përçarë BDI-në. Ai gjithashtu rikujton periudhën kur BDI ishte në pushtet, duke kritikuar Grubin se, sipas tij, në vend që të merrej me problemet e shqiptarëve, merrej me çështje të tjera.
Ky qëndrim i Selimit vjen në një moment kur në BDI vazhdojnë të përfliten përplasjet për ndikimin dhe drejtimin e partisë, ndërsa afërsia e tij me Bujar Osmanin ka bërë që deklarata të shihet edhe në kontekstin e raporteve mes Osmanit dhe Grubit.
Ndaj statusit të Selimit ka reaguar Artin Spahiu, i cili e ka akuzuar analistin se ka rënë në grackën e, siç e quan ai, shpifjeve dhe konstruksioneve politike kundër Artan Grubit. Spahiu pretendon se një pjesë e njerëzve brenda BDI-së, në bashkëveprim me VLEN-in, po përpiqen ta paraqesin Grubin si shkaktarin e një përçarjeje të mundshme të partisë.
Në reagimin e tij, Spahiu drejton akuza edhe ndaj figurave të tjera brenda BDI-së, duke pretenduar se pikërisht fraksionimet, largimet dhe interesat personale të disa individëve kanë dëmtuar partinë. Ai mbron Grubin, duke deklaruar se edhe në pozitën aktuale, ky i fundit punon për BDI-në më shumë se një pjesë e mirë e kryesisë aktuale.
Spahiu shkon edhe më tej, duke akuzuar disa drejtues të partisë se shqetësimi i tyre nuk është përçarja e BDI-së, por ruajtja e pozicioneve dhe ndikimit që kanë brenda saj. Sipas tij, Grubi po paraqitet si një “kurban” për të mbuluar përgjegjësitë e të tjerëve.
Përplasja mes dy qëndrimeve nxjerr në sipërfaqe një ndarje të mundshme brenda BDI-së, ku në njërën anë duket se janë ata që kërkojnë distancim nga Artan Grubi, ndërsa në anën tjetër qëndrojnë njerëzit që vazhdojnë ta mbrojnë atë.
Në prapavijë të këtij debati përmendet edhe rivaliteti i mundshëm mes Artan Grubit dhe Bujar Osmanit, dy figurave që kanë pasur ndikim të rëndësishëm në BDI.
Një gjë është e qartë: debati për atë se kush e ka dobësuar BDI-në, kush po tenton ta përçajë dhe kush duhet të mbajë përgjegjësi për gjendjen aktuale të partisë, po bëhet gjithnjë e më i hapur, ndërsa përplasjet mes njerëzve të afërt me dy figurat politike rrezikojnë të thellojnë edhe më shumë ndarjet brenda saj.

