Nga sot fëmijët e pavaksinuar kundër kollës së keqe nuk mund të vizitojnë çerdhet. Ministria e Shëndetësisë u ka lëshuar kopshteve urdhër, që fëmijët pa vërtetim vaksinimi të kthehen në shtëpi. E kjo nuk do të vlejë vetëm për Shkupin, ku është shpallur epidemi, por vlen për të gjithë territorin e vendit.
MSH urdhëron kopshtet: Të mos pranojnë fëmijë të pavaksinuar kundër kollës së keqe
“Zyrtarizmi me dokumente është nga sot, ne nuk funksionojmë vetëm me urdhëresa me shkrim, ne shumë më herët kemi vepruar dhe kemi thënë që të kthehen fëmijët e pavaksinuar, mendoj se ka mjaftueshëm sensibilizim dhe nuk ka arsyetim, a është prej datës sodit apo prej para dy javësh”, tha Ilir Demiri – ministër i Shëndetësisë.
I pyetur nëse masa për mos pranimin e fëmijëve të pavaksinuar në çerdhe është vonuar, duke qenë se ka kaluar gati një muaj nga rekomandimi, Demiri tha se nga sot ajo është zyrtare me dokument, por që rekomandimi është zbatuar më parë.
“Që dy javë e kam organizuar këtë, ndërsa është java e tretë që jam Ministër i Shëndetësisë, ta keni parasysh këtë, se sapo erdha veprova menjëherë. Jo vetëm në Shkup ku ka epidemi, por në nivel shtetëror do të ketë kontrolle të përforcuara të inspektorëve, do të kërkoj që me çdo kushte të rritet numri i të vaksinuarve”, deklaroi Ilir Demiri – ministër i Shëndetësisë.
Ndryshe, nga sot Inspektorati Sanitar Shëndetësor Shtetëror do të nisë me inspektimet e jashtëzakonshme dhe dhënien e vendimeve për ndalimin e pranimit në kopshte të fëmijëve të cilët nuk janë plotësisht të imunizuar me vaksinën DTP kundër kollës së keqe.
