Italia po përballet me një rritje të ndjeshme të numrit të personave që jetojnë mbi 100 vjeç. Sipas të dhënave më të fundit nga agjencia kombëtare e statistikave Istat, numri i njëqindvjeçarëve në vend është më shumë se dyfishuar krahasuar me vitin 2009.
Vetëm gjatë këtij viti, më shumë se 2,000 italianë kanë festuar 100-vjetorin e lindjes së tyre, dhe shumica dërrmuese janë gra, raportoi The Guardian. Aktualisht, 23,548 njëqindvjeçarë jetojnë në Itali, krahasuar me 21,211 në vitin 2024.
Sipas të dhënave të Istat, 724 persona në Itali janë më të vjetër se 105 vjeç, ndërsa 19 prej tyre kanë kaluar tashmë moshën 110 vjeç.
Fenomeni nuk është i kufizuar vetëm në Itali. Numri i njëqindvjeçarëve po rritet me ritme të shpejta në të gjitha vendet e Bashkimit Evropian, dhe parashikohet që deri në vitin 2050 ky numër të arrijë në rreth gjysmë milioni, nga 96,600 në vitin 2019, sipas të dhënave të përmbledhura nga Guardian.
Ndër vendet evropiane, Franca, Italia dhe Greqia kanë përqindjen më të lartë të personave mbi 100 vjeç. Sipas ekspertëve, dieta mesdhetare, e pasur me perime, vaj ulliri dhe peshk, jeta shoqërore aktive dhe sistemi i mirë shëndetësor janë ndër faktorët kryesorë që ndihmojnë italianët të jetojnë më gjatë.
