Valbon Limani edhe zyrtarisht është zgjedhur u.d. kryetar i komunës së Gostivarit. Në seancën e jashtëzakonshme të Këshillit komunal, ai mori besimin e 22 kolegëve të deritanishëm ku ishte kryesues Këshilli. Kundër ishin vetëm 8 këshilltarë nga BDI-ja. Ai vjen në këtë pozitë pasi kryetari i deritanishëm i komunës së Gostivarit, Arben Taravari u emërua ministër i shëndetësisë në qeverinë e re. Limani pas zgjedhjeve lokale të vitit 2021 u zgjodh kryesus Këshilli, pozitë të cilën e mbajti për gati dy vite e gjysëm. Pas zgjedhjes, në fjalën e tij Limani potencoi:
“Nuk mund të rri pa ju falenderuar për besimin që sapo më keni dhënë. Ne bashkohemi të gjithë nga një ideal i përbashkët.
Ju konsideroj ekip dhe nuk ju dalloj as nga partia, as nga feja dhe as nga etnia! Ju të shoh të gjithëve njësoj gostivaras! Ky Gostivar duhet të shkëlqej për të gjithë brezat qē do të vijnë dhe për të gjithë ata që e deshën dhe nuk janë më! Gostivari është misioni im personal dhe bashkë me të mirëqënia e secilit banor të tij! Dhe për në fund, por jo me më pak rëndësi, dua të falenderojë kolegët e deritanishëm në Këshillin komunal për punën e përbashkët dhe votën e tyre mbështetëse për pozitën e re. Faleminderit edhe kryetarit të deritanishëm, z. Arben Taravari për punën dhe mbështetjen, e cila besojë se do të vazhdojë edhe më tej. Faleminderit dhe le t’ia nisim punës!”.
Seancën gjatë zgjedhjes së Limanit në detyrën e re e udhëhoqi këshilltari mëi moshuar, Dashmir Arifi.
Paraprakisht Këshilli ka zgjedhur edhe këshilltarin e ri Millan Jovanoski nga radhët e VMRO-DPMNE-së, i cili do ta zëvendësojë këshilltarin e deritanishëm Goce Dimoski i cili është emëruar drejtor në TIRZ. Atij iu dorëzua edhe certifikata nga ana e KKZ – Gostivar menjëherë në sencën e sotme.
Poashtu, në këtë seancë u zgjodh edhe kryesuesi i ri i Këshillit, i cili vjen në vend të Limanit. Me Këshillin deri në fund të kësaj përbërje do të kryesojë Namik Durmishi, i cili është këshilltarë i shumicës nga radhët e ASH-së. Ai u zgjodh me 21 vota “për”, asnjë të përmbajtur dhe 9 “kundër”.
