Istanbul
Dy persona të armatosur të paidentifikuar hapën zjarr ndaj besimtarëve në një kishë katolike në lagjen Sariyer të Istanbulit, duke vrarë një person, thanë zyrtarët, raporton Anadolu.
Duke dënuar “sulmin e tmerrshëm”, guvernatori i Istanbulit Davut Gül u tha gazetarëve se viktima e sulmit të së dielës ishte 52 vjeç dhe se askush nuk u plagos.
Ministri i Brendshëm turk Ali Yerlikaya tha se incidenti ndodhi në orën 11:40 të mëngjesit me kohën lokale, gjatë meshës së mëngjesit, në Kishën Santa Maria.
“Një hetim në shkallë të gjerë” është duke u zhvilluar për të kapur të dyshuarit, tha Yerlikaya në “X”, duke shtuar: “E dënojmë fuqishëm këtë sulm të urryer”.
Arsyet e sulmit nuk dihen.
Pasi vizitoi kishën më vonë gjatë ditës, Yerlikaya u tha gazetarëve se policia po punon shumë për të hetuar incidentin.
Duke shpjeguar se ka shumë vende adhurimi në Istanbul dhe se adhurimi kryhet lirisht në secilën prej tyre në një mjedis të qetë dhe të sigurt, Yerlikaya tha se të gjitha komunitetet fetare të Türkiyes e vlerësojnë këtë mjedis të sigurt.
“Ata që përpiqen të prishin unitetin dhe solidaritetin e kombit tonë nuk do t’ia dalin kurrë. Dua ta nënvizoj veçanërisht këtë,” tha ai.
“Ata që kërcënojnë paqen dhe sigurinë e qytetarëve tanë nuk do t’i arrijnë kurrë qëllimet e tyre”, tha gjithashtu zëdhënësi i Partisë për Drejtësi dhe Zhvillim (AK) Ömer Çelik në një deklaratë të shkurtër në “X”.
Presidenti turk premton veprim pas sulmit
Presidenti turk Recep Tayyip Erdoğan gjithashtu përcolli ngushëllimet për komunitetin pas sulmit, duke shtuar se po ndërmerren hapat e nevojshëm për kapjen sa më të shpejtë të autorëve.
Në “X”, Drejtori i Komunikimeve Fahrettin Altun tha se Erdoğan ka folur në telefon me At Anton Bulai, i cili shërben në kishë, si dhe me guvernatorin e rrethit Sariyer, Ömer Kalaylı dhe Witold Lesniak, konsullin e përgjithshëm të Polonisë në Istanbul.
Popullsia e Polonisë është shumë katolike dhe Konsullata e Përgjithshme polake në Istanbul është afër kishës.
“Presidenti ynë, i cili përcolli ngushëllime dhe të shkuara për gjithë kongregacionin, tha se po ndërmerren hapat e nevojshëm për kapjen sa më të shpejtë të autorëve”, tha Altun.
Altun ndau edhe videon e telefonatave, ku Erdoğan i përcjell simpatitë e tij At Bulait, duke thënë: “Forcat tona të rendit janë aktualisht të mobilizuara me të gjitha aftësitë e tyre. Besoj se autori do të kapet së shpejti”.
Kryetari i parlamentit Numan Kurtulmuş e quajti sulmin “të neveritshëm” dhe gjithashtu ofroi ngushëllime për familjen e viktimës.
Ali Erbaş, kreu i Drejtorisë së Çështjeve Fetare të Türkiyes, denoncoi “sulmin e urryer” dhe i shprehu ngushëllime familjes së viktimës.
Erbaş vizitoi kishën dhe u tha gazetarëve: “Dëshiroj të theksoj se dallimet janë pasuria jonë. Vendet e adhurimit, veçanërisht gjatë adhurimit, kanë paprekshmëri të plotë. Sipas besimit tonë, xhamitë, kishat dhe sinagogat janë të paprekshme. Pavarësisht besimit, ato janë vende adhurimi”.
“Si shtet dhe komb, ne do të ruajmë gjithmonë unitetin dhe solidaritetin tonë. Bashkëjetesa e njerëzve të besimeve të ndryshme është një pasuri shumë e rëndësishme për ne”, shtoi ai.
