Me një rezolucion prej më shumë se 3.2 gigapikselë, një peshë prej gati tre tonësh dhe një ambicie për t’i dhënë fund kërkimeve dekadash, kamera dixhitale më e madhe e krijuar ndonjëherë për qëllime astronomike është gati për t’u instaluar në veri të Kilit.
Pjesët e nevojshme për të montuar observatorin Vera C.. Rubin, ashtu si teleskopi dhe vetë kamera, udhëtoi me disa automjete për në majën e Cerro Pachon në rajonin Coquimbo, në skajin e shkretëtirës Atacama.
Stuart Corder, drejtues shkencor i shoqatës universitare “AURA” dhe zëvendësdrejtor i qendrës “NOIRLab” që do të menaxhojë observatorin, shprehu shpresën se çdo gjë do të jetë gati për instalim në fund të këtij viti.
Në faqen zyrtare thuhet se Observatori Rubin është një sistem kompleks, i integruar me një teleskop me diametër tetë metra, kamera dhe përpunim automatik të të dhënave.
Ai do të regjistrojë afërsisht 20 terabajt të dhëna në ditë dhe një studim 10-vjeçar do të prodhojë një katalog të dhënash prej 15 petabajt. Qëllimi i hulumtimit është të kuptojë materien e errët të universit, si dhe rrezikun e një asteroidi që godet Tokën, një yll ose një planet afër Diellit.
AURA është një konsorcium prej 47 institucioneve amerikane dhe tre partnerëve ndërkombëtarë që operojnë observatorë astronomikë për Fondacionin Kombëtar të Shkencës dhe NASA-n. Kili pret investime të shumta astronomike falë qiellit të pastër të shkretëtirës Atacama.
