Presidentja Vjosa Osmani i ka thënë Aleksandar Vuçiqit se do të dështojë sërish, pas deklaratave kërcënuese të presidentit serb për pushtimin e Kosovës.
Vuçiqi ka thënë se Serbia do ta presë “momentin më të mirë të mundshëm dhe do ta shfrytëzojë rastin”, duke aluduar në pushtim të Kosovës.
Por Osmani ka thënë se Vuçiqi do të dalë i dështuar nga kjo.
“Deklarata që u publikua mbrëmë është vazhdimësi. Njësoj si edhe në të kaluarën, ai duhet ta dijë se do të dalë i dështuar, sepse të gjitha përpjekjet e Serbisë nga viti 1998-99 e tutje, që ta pushtojnë Kosovën dhe ta kenë territorin e Kosovës, kanë dështuar”, ka deklaruar Osmani në një deklaratë të publikuar nga Presidenca.
Ajo përmendi sakrificën e popullit të Kosovës dhe luftën çlirimtare, por edhe partnerët ndërkombëtarë që kanë mbrojtur, siç tha ajo, vlerat më të rëndësishme të lirisë dhe demokracisë.
“Edhe sot 25 vite pas kur në qershor do të festojmë këtë përvjetor jubilar të çlirimit të Kosovës jemi me fat e të bekuar si popull që në krah kemi aleatët tanë të cilët bashkë me ne siç edhe kanë deklaruar së fundmi do ta mbrojnë çdo pëllëmbë të Kosovës”, ka thënë Osmani.
