Fatkeqësisht në këtë ditë duhet të kujtojmë se nxënësit e vendit tanë u gjendën sërish në grupin e vendeve që tregojnë rezultatet më të këqija në lexim, matematikë dhe shkenca natyrore sipas testit të fundit PISA të vitit 2022. Ndërsa Ministria e Arsimit ia atribuoi suksesin e dobët pasojave negative të pandemisë Kovid në cilësinë e arsimit në shkallë globale
Anëmsha SHABANI
Shkup, 24 janar – Në Ditën Ndërkombëtare të Arsimit studentët festojnë edhe një herë sfidat dhe problemet e kamotshme me të cilat ballafaqohet sistemi arsimor, duke filluar që nga sallat e pandërtuara të fakulteteve, deri te tavolinat shkollore të testit PISA. Fatkeqësisht në këtë ditë duhet të kujtojmë se nxënësit e vendit tanë u gjendën sërish në grupin e vendeve që tregojnë rezultatet më të këqija në lexim, matematikë dhe shkenca natyrore sipas testit të fundit PISA të vitit 2022. Ndërsa Ministria e Arsimit dhe Shkencës (MASH) ia atribuoi suksesin e dobët pasojave negative të pandemisë Kovid në cilësinë e arsimit në shkallë globale. Ndërkaq, përfaqësuesja e organizatës UNICEF në vend, Patricia Dixhovani, u bëri thirrje të gjithë liderëve të partive politike që të zotohen se reformat strukturore në arsim do të jenë prioritet kombëtar ndërpartiak.
“Rezultatet tregojnë se tre të katërtat apo 74 për qind e nxënësve 15-vjeçarë në vend kanë rezultate të dobëta në lexim, ndërsa dy nga tre nxënës tregojnë rezultate të ulëta në matematikë (64 për qind) dhe shkenca natyrore (65 për qind). Vendi ka vite që po përballet me një krizë mësimi”, tha Dixhovani.
Një nga sfidat më të vështira që u përball arsimi sivjet ishte mungesa e teksteve shkollore, ku nxënësit e klasave të treta dhe të gjashta e nisën këtë vit shkollor pa një tekst të vetëm. Komisioni për Parandalimin dhe Mbrojtjen nga Diskriminimi vendosi të ngrejë padi për mbrojtje nga diskriminimi në interes të publikut ndaj MASH-it. Megjithatë edhe gjysmëvjetori i dytë vijoi po njëjtë pa libra dhe tekste shkollore.
Duket se çdo vit po përsëriten sfidat e njëjta në arsim, ashtu si vitin e kaluar edhe sivjet kushtet e mjerueshme në konviktet e studentëve vijojnë njëjtë. Rinovimet dhe ankesat drejtuar MASH-it, i lanë në rrugë studentët në fillimin e vitit shkollor. Mbi 800 ankesa u bënë vetëm në shtator Konvikti studentor shtetëror – Shkup (KSSH) lidhur me vendosjen në konvikte. Rreth 200 nga ankesat për transferim nga një konvikt në tjetrin, përkatësisht për transferim në konviktin e studentëve “Goce Dellçev”, 200 të tjera nga konvikti “Pellagonia” për lirim nga pagesa e qirasë dhe ushqimit në konvikt dhe të tjerat janë nga konvikti “Stiv Naumov”.
Nga ana tjetër nuk ka aktivitete të reja ndërtimore në parcelën pranë Kampusit Social të UKIM ku do të ngriheshin objektet e Fakultetit të Shkencave të Informacionit dhe Inxhinierisë Kompjuterike (FINKI) dhe Fakultetit të Edukimit Fizik, Sportit dhe Shëndetit. Në muajin shkurt, MASH-i njoftoi se ndërtimi i objekteve do të vazhdojë gjatë gjithë vitit dhe për këtë janë siguruar mjete nga buxheti për vitin 2023. Mirëpo, edhe pas 11 vitesh nga themelimi, FINKI, i cili ka interesin më të madh te studentët, nuk ka objektin e tij.
Studentët nga universitetet private të Shkupit kanë të drejtë ligjore për transport publik falas, por përkundër kësaj, ata kanë vite që paguajnë për të shkuar nga shtëpia në fakultet. Pas tyre vitin e kaluar qëndroi Komisioni për Parandalimin dhe Mbrojtje nga Diskriminimi, e cila konstatoi se Qyteti i Shkupit i diskriminon duke ua mohuar të drejtën e “lirisë” nga NQP-ja, pas së cilës njoftoi se do të ngrejë padi për mbrojtje nga diskriminimi në interes publik. Mirëpo, komisioni në fillim të tetorit të vitit të kaluar njoftoi se nuk kanë financa për të ngritur padi, pas së cilës çështja e transportit të studentëve nga fakultetet private mbeti e hapur dhe pa kandidatë për zgjidhjen e saj. Ndryshe, ky vit akademik është i teti me radhë që Qyteti i Shkupit i transferon mjetet NQP-së për transport falas të studentëve të rregullt nga fakultetet shtetërore. (koha.mk)
