Kryeministri i Kosovës, Albin Kurti ka takuar sonte përfaqësuesin e Lartë të Bashkimit Evropian për Punë të Jashtme dhe Politikë të Sigurisë, njëherësh edhe zëvëndëspresident i Komisionit Evropian, Josep Borrell, si dhe përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajçak, ku kërkoi heqjen e masave kufizuese të padrejta të vendosura nga Bashkimi Evropian.
Ky takim është bërë konferencën e Sigurisë në Mynih, shkruan Reporteri.net
Sipas një njoftimi të zyrës së kryeministrit thuhet se në takim u bisedua për procesin e dialogut, zbatimin e marrëveshjeve të dakorduara, dhe normalizimin e marrëdhënieve ndërmjet Kosovës dhe Serbisë.
Kurti ka kërkuar edhe një herë që marrëveshjet e arritura ndërmjet dy vendeve të nënshkruhen nga Serbia.
“Në dritën e shkeljeve të vazhdueshme nga Serbia, sulmit terrorist dhe paramilitar në Banjskë ndaj integritetit territorial të Kosovës dhe sigurisë kombëtare, letrave dhe deklaratave të vazhdueshme publike për mosdetyrimin ligjor të marrëveshjes për Serbinë dhe për moszbatimin e plotë të Marrëveshjes Bazike të arritur në Bruksel dhe Aneksit të saj në Ohër, nënshkrimi i marrëveshjeve është bërë i nevojshëm si garancë e respektimit dhe zbatimit të plotë të tyre, drejt normalizimit të plotë të marrëdhënieve ndërmjet dy vendeve.”, thuhet tutje në njoftim.
Theksojmë se Kosova është nën masa ndëshkuese nga Bashkimi Evropian qysh në fund të muajit qershor të vitit të kaluar, për të cilat zëdhënësi i BE-së, Peter Stano pati njoftuar se ato janë të përkohshme, por që vazhdojnë ende të jenë në fuqi.
