Partia Liberal-Demokratike dënon ashpër përhapjen e papërgjegjshme dhe të pakontrolluar të përmbajtjeve në rrjetet sociale dhe nisi një iniciativë për shfuqizimin e Tik-Tok-ut në Maqedoni.
Njëmbëdhjetë fëmijë janë lënduar në Shkup për shkak të sfidës së Tik-Tok “Superman”. Më i vogli është vetëm 10 vjeç. Bilanci është në 6 ditët e fundit. Nga PLD thonë se për shkak të kësaj sfide, vetëm në 24 orët e fundit janë lënduar edhe gjashtë fëmijë të tjerë në Shkup dhe qytete të tjera të Maqedonisë.
Ata kujtojnë propozimin që i është dorëzuar Ministrisë së Arsimit dhe Shkencës vitin e kaluar menjëherë pas ngjarjeve fatkeqe në Serbinë fqinje, ku kërkohet kontrolli i përmbajtjeve që transmetohen në rrjetet sociale, si dhe ndalimi i përmbajtjeve që nxisin dhunë.
“Më i riu nga të plagosurit është vetëm 10 vjeç, ndërsa më i madhi 17 vjeç. Këto të dhëna nuk janë vetëm shqetësuese, por edhe alarmante. Fëmijët, kategoria jonë më vulnerabël, bëhen viktima të lojërave të rrezikshme që tregtohen përmes rrjeteve sociale. Ato përmbajtje, nën petkun e “argëtimit”, paraqesin një kërcënim serioz për shëndetin e tyre fizik dhe mendor dhe ne si shoqëri duhet të marrim përgjegjësi dhe të parandalojmë aksidente të tilla.
Mungesa e kontrollit adekuat mbi përmbajtjen e disponueshme në rrjetet sociale lejon që “lojëra” të tilla të arrijnë përdoruesit më të cenueshëm. Kjo është një goditje e drejtpërdrejtë ndaj përgjegjësisë sonë kolektive si parti politike, si prindër, si institucione, por edhe në përgjithësi si shoqëri”, tha PLD.
Prej aty kërkojnë rregullim të menjëhershëm të përmbajtjeve të rrjeteve sociale duke vendosur masa për ndalimin e atyre që inkurajojnë dhunën dhe sjelljet vetëshkatërruese, rritjen e vëzhgimit dhe vendosjen e sanksioneve për platformat që vënë në dispozicion përmbajtje të rrezikshme për të miturit.
