Zëvendësministri i Bujqësisë, Albrim Hoxha, njoftoi për një investim prej 12 milion denarësh në kuadër të Programit për zhvillim rural 2024, me qëllim forcimin e sektorit agro-ushqimor në vend.
Sipas tij, projekti realizohet në bashkëpunim me Universiteti i Tetovës dhe përfshin modernizimin e infrastrukturës laboratorike përmes masës 1 “Mbështetje teknike në bujqësi dhe zhvillim rural”, duke mbuluar 100 për qind të kostove.
Hoxha theksoi se investimi përfshin furnizimin me pajisje moderne të tipit LC-MS/MS për detektimin e mbetjeve të pesticideve në ushqim, si dhe trajnimin e stafit profesional për përdorimin e tyre.
Ai shtoi se ky projekt krijon kushte konkrete për mbështetje profesionale të fermerëve, rrit konkurrueshmërinë e industrisë ushqimore dhe forcon kapacitetet institucionale për kontroll dhe siguri ushqimore.
“Ky nuk është vetëm një investim në pajisje, por në sigurinë e konsumatorit, cilësinë e prodhimit vendor dhe afrimin me standardet evropiane, duke lidhur drejtpërdrejt shkencën me praktikën”, deklaroi Hoxha.
Nga Ministria e Bujqësisë theksojnë se mbeten të përkushtuar për të vazhduar me investime strategjike që kontribuojnë në zhvillimin rural dhe mbrojtjen e shëndetit të qytetarëve.
