Ministrja e Drejtësisë, Albulena Haxhiu, ka akuzuar opozitën në Kuvend për bllokim të reformës në drejtësi, duke thënë se gjendja në Këshillin Prokurorial të Kosovës është e rëndë.
Para deputetëve, ministrja Haxhiu tha të enjten se nëpërmjet Gjykatës Kushtetuese po vështirësohet reforma në drejtësi, duke shtuar se “qytetarët s’mund t’i gënjejë”.
“Kur të më pyesin qytetarët pse Albulenë s’ka reforma në drejtësi, unë ata s’mund t’i gënjejë, duhet t’ua tregoj arsyen e vërtetë që opozita i ka bllokuar. Ju ftoj të kontributin për të mbërri reformë në Këshillin Prokurorial. Gjendja këtu po vështirësohet”, është shprehur Haxhiu.
Ministrja Haxhiu ka thënë se së fundmi ka pasur pazare për emërime në pozita të larta të KPK-së.
“Nuk do të kishim nevojë pë vetting nëse do ta kishim një Këshill Prokurorial në nivel të lartë të detyrës”, ka potencuar ajo.
Një ditë më parë, Haxhiu ka thënë se opozita ka penguar punën e saj përgjatë tri vjetëve të Qeverisë Kurti.
Sipas saj, sfidë ka qenë jetësimi i reformës, duke theksuar se qytetarët e kanë mbështetur këtë reformë.
