Gashi: Është momenti që ta përmbyllim një cikël të errët të jetës tonë, dhe t’i japim mundësi shpresës, suksesit!

Kryetari i partisë Alternativa, Afrim Gashi, nga tubimi partiak në Tearcë, tha se e di që është e vështirë që të kthehen mërgimtarët që janë larguar nga vendi jonë, por se sipas tij, kjo nuk është edhe e pamundur.
“Mendoj se duhet të bëjmë çmos që në vendbanimet tona ku jetojmë të krijojmë kushte të mira të i dinjitetshme, kushte të mira ekonomike, standarde më të larta në arsim, shëndetësi e kështu me radhë dhe jam i bindur që dalë ngadalë do të vijnë njerëz që të investojnë këtu, do të vijnë njerëz që do të ndërtojnë shtëpi këtu… besoj që nëse jemi vizionar më afat gjatë, besoj se do të duhet të ndërtojmë kushte që edhe për banorët këtu që janë, sidomos të rinjtë dhe të rejat t’i ndalim, por edhe të bëjmë çmos që bashkatdhetarët tanë t’ju krijojmë kushte të mira që edhe ata të kthehen në vendlindje”, deklaroi kryetari i Alternativës, Afrim Gashi.
Sipas tij jemi duke ju afruar një fazës 22 vjeçare dhe fillimit të një faze tjetër 20 vjeçare që, sipas tij, mendon se është faza e zhvillimit, e prosperitetit, avancimit të shqiptarëve në Maqedoni. “Besoj shumë fuqishëm se me 8 maj do të ndodh ndryshimi dhe jam shumë i bindur se do të fillojmë dalë ngadalë me politika të mençura, të detektojmë problemet kryesore ku janë dhe të fillojmë t’i zgjidhim dalë ngadalë”, u shpreh Gashi.
Gashi, mes tjerash u shpreh se ”ky është momenti i fundit kur duhet të bashkohemi që të mund ta përmbyllim një cikël të errët të jetës sonë, për t’i dhënë mundësi shpresës, suksesit e mirëqenies”. “24 prilli dhe 8 maji është mundësi e rrallë që ne të mund ta ndalim rininë tonë në këto troje dhe të mundësojmë jetën më të mirë për secilin qytetar”, përfundoi ai.