Serbia edhe asnjë shtet tjetër nuk mund t’ua përcaktojë fqinjëve të vetë zgjedhjen e aleancave të sigurisë.
Kështu deklaroi për gazetën online Reporteri.net, zëvendësndihmësi i Sekretarit të Shtetit, Gabriel Escobar, i cili, duke komentuar dhe deklaratës së ambasadorit amerikan në Beograd, Christopher Hill, i cili pati thënë se “Serbia sot është më afër NATO-s, sesa Kosova”, shtoi se SHBA mirëpret angazhimin pozitiv të Serbisë me NATO-n.
Ai më tej tha se “Kosova ka marrëdhënie të shkëlqyera me NATO-n nëpërmjet KFOR-it dhe NALT dhe ka marrëdhënie të shkëlqyera të sigurisë me shumë aleatë të NATO-s, përfshirë SHBA-në”.
Escobar kundrejt deklaratës së president tit të Serbisë, Aleksandar Vuçiq, se në rast se Perëndimi zgjedh Kosovën, “Serbia do të presë momentin më të mirë të mundshëm dhe ne do ta shfrytëzojmë mundësinë tonë”, tha se asnjë shtet nuk mund ta pengojë tjetrin në orientimin e saj strategjik dhe zgjedhjen e aleancave të veta të sigurisë.
“SHBA-ja beson se të gjitha shtetet janë të lira për të përcaktuar vetë politikën e jashtme dhe të zgjedhin aleancat e veta të sigurisë. Asnjë shtet nuk duhet të pretendojë veto ndaj orientimeve strategjike të fqinjëve të vet“, tha Escobar për gazetën online Reporteri.net.
Ndryshe, ndaj deklaratës së Vuçiqit, ka reaguar të mërkurën edhe ambasadori amerikan në Kosovë, Jeffrey Hovenier.
Ai, në një konferencë për media, tha siguria e Kosovës dhe siguria që garanton SHBA-ja është më e fortë se kurrë. “Nuk e humbim gjumin duke u shqetësuar për këto kërcënime , sepse besojmë se NATO është gati dhe e përgatitur”.
Po kështu edhe presidentja e Kosovës, Vjosa Osmani, ka deklaruar se një shtet si Serbia, i cili vazhdimisht ka shkelur vlerat mbi të cilat qëndron NATO-ja, as që mund të ëndërrojë që një ditë të jetë pjesë e aleancës veri-atlantike
