Kajro
Egjipti ka paralajmëruar kundër një sulmi tokësor izraelit në qytetin Rafah në Rripin e Gazës jugore dhe ka bërë thirrje për një armëpushim në enklavën e rrethuar, transmeton Anadolu.
Ministria e Punëve të Jashtme e Egjiptit tha se një sulm në Rafah, ku 1.4 milionë njerëz janë strehuar nga lufta e vazhdueshme izraelite, do të kishte pasoja të rënda humanitare.
“Do të dëmtojë civilët palestinezë që u strehuan në Rafah si streha e fundit e sigurt brenda Gazës”, theksoi ministria egjiptiane.
Të premten, kryeministri izraelit, Benjamin Netanyahu, autorizoi planet ushtarake për një operacion tokësor në Rafah.
“Çdo operacion (në Rafah), pavarësisht refuzimit ndërkombëtar, pasqyron indiferencë ndaj jetëve të civilëve të pafajshëm dhe është një shkelje e rëndë e ligjit ndërkombëtar dhe ligjit ndërkombëtar humanitar”, tha ministria.
Egjipti gjithashtu i bëri thirrje Izraelit të ndalojë politikat e “ndëshkimit kolektiv kundër banorëve të Rripit të Gazës, duke përfshirë rrethimin, urinë, shënjestrimin pa dallim të civilëve dhe shkatërrimin e infrastrukturës”.
Vendi u kërkoi palëve ndërkombëtare të interesuara dhe Këshillit të Sigurimit të OKB-së të marrin përgjegjësitë e tyre duke bërë thirrje për një armëpushim të menjëhershëm në Gaza.
Izraeli ka zhvilluar një ofensivë vdekjeprurëse ushtarake në Rripin e Gazës që nga sulmi ndërkufitar i 7 tetorit i udhëhequr nga Hamasi, në të cilin sipas Tel Avivit u vranë afër 1.200 njerëz.
Më shumë se 31.600 palestinezë, kryesisht gra dhe fëmijë, janë vrarë në Gaza dhe të paktën 73.676 të tjerë janë plagosur në mes të shkatërrimit në masë dhe mungesës së nevojave themelore.
Sipas Kombeve të Bashkuara (OKB), lufta izraelite ka çuar në zhvendosjen e brendshme të 85 për qind të popullsisë së Gazës mes një bllokade të shumicës së ushqimeve, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të sigurojë që forcat e tij të mos kryejnë akte gjenocidi dhe të garantojë që ndihma humanitare të ofrohet për civilët në Gaza.
