Washington DC
Presidenti amerikan Joe Biden, në fjalimin e tij të parë të fushatës që nga tentative për atentat kundër ish-presidentit Donald Trump, përsëriti thirrjen e tij për të “ulur temperaturën” në politikë, por vuri në dukje se kjo “nuk do të thotë që ne duhet të ndalojmë të themi të vërtetën”, transmeton Anadolu.
“Vetëm për shkak se ne duhet të ulim temperaturën në politikën tonë pasi lidhet me dhunën, nuk do të thotë që ne duhet të ndalojmë së treguari të vërtetën”, tha Biden mbrëmë teksa iu drejtua një konvente të Shoqatës Kombëtare për Përparimin e Njerëzve me Ngjyrë (NAACP) në Las Vegas. Ai vazhdoi të kritikonte ish-presidentin Trump për politikat e tij në lidhje me amerikanët me ngjyrë.
Duke kujtuar atentatin e së shtunës kundër Trump-it, Biden tha se ishte “mirënjohës” që ish-presidenti nuk ishte plagosur rëndë, duke u lutur për të dhe familjen e tij.
“Është koha për një bisedë të rëndësishme në këtë vend. Politika jonë është ndezur shumë. Unë thashë në Zyrën Ovale të dielën mbrëma, siç e kam bërë të qartë gjatë gjithë presidencës sime, se ne të gjithë kemi përgjegjësi për të ulur temperaturën dhe për të dënuar dhunën në çdo formë. Ne nuk duhet të harrojmë se në Amerikë, ne nuk jemi armiq. Ne jemi miq, fqinj, qytetarë amerikanë”, tha Biden.
Megjithatë, më vonë ai vazhdoi të kritikonte ish-presidentin Trump për historikun e tij në ekonomi, kujdesin shëndetësor, dhunën me armë dhe shumë çështje të tjera.
Ai tha se presidenca e Trump ishte “ferr” për amerikanët me ngjyrë dhe e akuzoi atë për shfuqizimin e “Obamacare” dhe largimin e miliona amerikanëve me ngjyrë nga sigurimet shëndetësore.
“Dhuna nuk është zgjidhja”, tha Biden, duke shtuar se ai qëndron kundër të gjitha formave të dhunës, përfshirë kundër amerikanëve me ngjyrë si George Floyd, i cili u vra më 25 maj 2020 nga oficeri i policisë në Minneapolis, Derek Chauvin, pasi policia u gjunjëzua në qafën e tij për gati 10 minuta derisa ai vdiq.
“Më shumë fëmijë në Amerikë vdesin nga plagët me armë zjarri se nga çfarëdo arsye tjetër. Kjo është habitëse dhe kjo është e neveritshme”, tha Biden, duke shtuar:
“Nëse doni të qëndroni kundër dhunës në Amerikë, atëherë bashkohuni me mua në heqjen e këtyre armëve të luftës nga rrugët e Amerikës. Një AR-15 u përdor në të shtënat ndaj Donald Trump-it. Është koha për t’i nxjerrë jashtë ligjit”.
