Agjencia gjermane e lajmeve DW në shkrimin e sotëm bën të ditur se ishte BDI ajo që e tërhoqi balancuesin kur ishte në pushtet.
“Faktet tregojnë se BDI kur ishte në pushtet bashkë me partnerët në Qeveri janë pajtuar se nevoja për balancues ishte tejkaluar. Këtë e tregon Strategjia e Reformës së Administratës Publike 2023-2030 me Planin e Veprimit 2023-2026. Është akt i qeverisë nga korriku i vitit 2023, që do të thotë se është miratuar në mandatin e Qeverisë së LSDM-së dhe BDI-së. Në të, në faqen 47, thuhet se “kapërcehet nevoja e përdorimit të mjetit të quajtur ‘balancues’, i cili në praktikë shkakton keqpërdorime të shumta”, bën të ditur DW.
Sipas DW, kjo thuhet në mënyrë të prerë në rubrikën “Shërbimi publik dhe menaxhimi i burimeve njerëzore”, ku shpjegohet se synimi i përgjithshëm është një administratë publike e departamentizuar e profesionale.
“Është e vetmja mënyrë që mund t’u garantojë qytetarëve një realizim më të shpejtë, cilësor dhe më të lirë të të drejtave të tyre individuale, si dhe mbrojtje të interesit publik”, thuhet në Strategji.
Më tej shtjellohet se përse është tejkaluar nevoja për balancues.
“Përkatësisht, parimi i qasjes së barabartë në çdo vend pune, parimi i ekspertizës dhe kompetencës dhe parimi i barazisë gjinore duhet të jenë parësor dhe të zbatohen vetëm në të gjithë procesin e përzgjedhjes, punësimit dhe avancimit në të gjitha nivelet në administratën publike, ndërsa në fazën para marrjes së vendimit zgjedhor, sigurisht që duhet të merret parasysh parimi i përfaqësimit adekuat dhe të drejtë të pjesëtarëve të komuniteteve. Në këtë mënyrë, nga njëra anë, kapërcehet nevoja e aplikimit të mjetit të quajtur ‘balancues’, i cili në praktikë shkakton keqpërdorime të shumta, dhe nga ana tjetër, mbetet zbatimi i parimit të përfaqësimit adekuat dhe të drejtë të pjesëtarëve të komuniteteve.
Me kritere e objektivave dhe procedurave të një garimi të hapur për përzgjedhjen e kandidatit më të mirë, të kryer nga profesionistë të administratës që zotërojnë profesionalizëm dhe integritet të lartë, do të bëhet diga nga ndikimi politik”, shkruhet në faqen 47. të Strategjisë për Reformën e Administratës Publike 2023-2030, miratuar në kohën kur BDI ishte parti në pushtet, bën të ditur ndër të tjera agjencia gjermane DW
