Shkollat në Maqedoninë e Veriut po përballen me një numër gjithnjë e më të vogël nxënësish, ndërsa zhvillimet negative demografike tashmë po reflektohen drejtpërdrejt në numrin e paraleleve dhe organizimin e mësimit. Ministrja e Arsimit dhe Shkencës, Vesna Janevska, thotë se shteti do të duhet ta përshtatë rrjetin shkollor me realitetin e ri, por se kjo nuk duhet të nënkuptojë automatikisht largimin nga puna të mësuesve.
Janevska, e ftuar në emisionin “Studio e Natës” në 4TV, theksoi se rënia e numrit të lindjeve, emigrimi dhe ndryshimet në mënyrën e jetesës dhe modelet familjare tashmë po ndihen në sistemin arsimor.
“Është fakt se kemi një situatë të keqe demografike”, tha Janevska, duke theksuar se pasojat janë paralele me numër të vogël nxënësish, klasa të zbrazëta dhe nevoja për një organizim ndryshe të mësimit.
Sipas ministres, optimizimi i rrjetit shkollor nuk duhet të çojë në humbje masive të vendeve të punës. Një nga zgjidhjet është zgjerimi i mësimit me një turn dhe mësimit gjatë gjithë ditës, si dhe qëndrimi më i gjatë i nxënësve në shkolla.
Mësuesit të cilët, për shkak të uljes së numrit të paraleleve, do të kishin një ngarkesë më të vogël me orët e rregullta mësimore, mund të angazhohen në mësim plotësues dhe shtesë, lëndë zgjedhore dhe aktivitete jashtëmësimore, punë me nxënës që kanë vështirësi në të nxënë, si dhe me nxënës të talentuar.
Në këtë mënyrë, stafi ekzistues mësimor do të mbetej pjesë e procesit arsimor, por angazhimi i tij do të përshtatej gradualisht me strukturën e re të mësimit. Sipas njoftimeve, optimizimi nuk do të kufizohej vetëm në bashkimin apo mbylljen e paraleleve, por edhe në një organizim tjetër të të gjithë ditës shkollore.
Janevska paralajmëron se rënia demografike është një problem më i gjerë, i cili nuk mund të zgjidhet vetëm përmes riorganizimit të arsimit. Nëse numri i fëmijëve vazhdon të ulet, shteti do të duhet të përshtatë vazhdimisht infrastrukturën shkollore, rrjetin e shkollave dhe mënyrën e shfrytëzimit të stafit mësimor.
