Ministri i Transformimit Dixhital, Stefan Andonovski tha se aplikacioni m.Shërbime, do t’u lejojë qytetarëve të kenë letërnjoftimin, patentën e shoferit dhe dokumente të tjera në formë elektronike, në një vend në telefonin e tyre celular.
“Një vit më parë, versioni demo u promovua në Samitin Dixhital të Ballkanit Perëndimor në Shkup. Që atëherë, disa mijëra qytetarë e kanë testuar aplikacionin dhe kemi marrë më shumë se 200 komente. Përveç kësaj, gjatë analizës që kryem, identifikuam disa aspekte të funksionalitetit që duheshin përmirësuar. Elementi i dytë i rëndësishëm ishte të biem dakord për një protokoll shkëmbimi të dhënash me Ministrinë e Brendshme, pasi Ministria e Brendshme është institucioni burimor për të dhënat nga letërnjoftimet dhe patenta e shoferit”, tha Andonovski për “360 shkallë”.
Ai theksoi se letërnjoftimet dhe patenta e shoferit janë vetëm fillimi në zhvillimin e aplikacionit.
“Ideja është që m.Shërbime të vijë në jetë si një super aplikacion. Qëllimi nuk është që të ketë të disponueshme vetëm letërnjoftimin dhe patentën e shoferit, por të funksionojë si një portofol dixhital në të cilin qytetarët do të jenë në gjendje të kenë dokumente të tjera që përdorin shpesh në një vend, siç janë certifikatat, diplomat”, tha Ministri.
