Shaip Kamberi: Serbia ndalon me ligj përdorimin e flamurit kombëtar shqiptar në Luginën e Preshevës

Deputeti i vetëm shqiptar në Kuvendin e Serbisë, Shaip Kamberi, ka folur për situatën e shqiptarëve në Luginën e Preshevës, duke theksuar ndalimin ligjor të përdorimit të flamurit kombëtar shqiptar nga autoritetet serbe. Kamberi tha se shqiptarët në këtë rajon vazhdojnë të festojnë në rrethana të shtrënguara, gjithmonë në pritje të ndërhyrjeve ose ndëshkimeve nga institucionet lokale. “Serbia mbetet një vend që, me ligj, ndalon përdorimin e flamurit kombëtar. Në të gjitha këto vite, ne shënojmë këtë ditë nën rrethana të vështira, duke u përballur me mundësinë e ndërhyrjeve ose dënimeve”, tha Kamberi, duke theksuar sfidat e vazhdueshme për ruajtjen e identitetit dhe të drejtave kulturore të shqiptarëve në Luginë. Ai bëri thirrje për ndërgjegjësim dhe mbështetje për komunitetin shqiptar në këtë rajon, duke theksuar rëndësinë e respektimit të të drejtave kombëtare dhe kulturore.