Kryetari i Komisionit Qendror të Zgjedhjeve (KQZ), Kreshnik Radoniqi ka deklaruar se procesi i numërimit të votave për kandidatët për deputetë mund të zgjasë deri në dy javë.
Sipas tij kjo është një e përafërt ndonëse nuk është bërë një vlerësim sa sa do të zgjatet tërë procesi për t’u përmbyllur numërimi.
“Meqenëse nuk kemi filluar në të gjitha Qendrat Komunale të Numërimit për të parë se si po shkon atje procesi, nuk e kemi bërë një vlerësim se sa do të zgjatet tërë procesi për t’u përmbyllur numërimi, por një e përafërt do të jetë 10 ditë, dy javë”, ka thënë Radoniqi në mbledhjen e KQZ-së të mbajtur të enjten.
Në mbledhjen e KQZ-së është bërë e ditur se tashmë ka nisur procesi i numërimit të votave për kandidatët për deputetë në 18 komuna, në tetë komuna numërimi pritet të nisë sot, ndërsa në 12 të tjera po bëhen përgatitje.
