Në ambientet e Albkontroll, Agjencisë Kombëtare të Shërbimeve të Navigimit Ajror të Shqipërisë, u zhvillua një takim pune mes përfaqësuesve të M-NAV Sistemi i Kontrollit të Fluturimeve të Maqedonisë së Veriut dhe Albkontroll.
Në takim morën pjesë drejtori ekzekutiv i M-NAV, z. Fatmir Zimberi, kryetari i Këshillit Drejtues, z. Vladimir Risteski, si dhe drejtori i përgjithshëm i Albkontroll, z. Dritan Isaku. Gjithashtu, në punimet e takimit ishin të pranishëm edhe kontrollorë të trafikut ajror dhe anëtarë të ekipeve teknike nga të dyja institucionet.
Diskutimet u përqendruan në thellimin e bashkëpunimit mes dy agjencive, shkëmbimin e përvojave profesionale dhe zhvillimin e projekteve të përbashkëta në fushën e menaxhimit të hapësirës ajrore. Palët vlerësuan kontributin e ekspertëve teknikë dhe kontrollorëve, duke theksuar rëndësinë e përfshirjes së tyre në proceset e përbashkëta të zhvillimit.
Ky takim në Tiranë konfirmon angazhimin e përbashkët të M-NAV dhe Albkontroll për të avancuar standardet e aviacionit civil dhe për të forcuar bashkëpunimin strategjik rajonal, duke garantuar një koordinim më të sigurt dhe më efikas të trafikut ajror në hapësirat ajrore të të dy vendeve.
