“Sidomos bie në sy prezenca e virusit të gripit sezonal tek fëmijët dhe të rinjtë. Sa i takon gjeneratës së tretë, sidomos ata të cilët kanë pranuar vaksinën, numri i të sëmurëve është i pritshëm, por prezenca e pacientëve të rinj dhe fëmijëve shqetëson”, epidemiologia Jovanka Sturlakova-Koroveshovska
Vjollca SADIKU
Dibër, 16 janar- Institucionet shëndetësore, të cilët mbrojnë shëndetin publik në Komunat Dibër dhe Qendër Zhupë, informojnë se në këtë filimvit, ka një rritje drastike të të sëmurëve nga virozat sezonale dhe gripi. Në Entin për Shëndet Publik – Ohër, e cila mbulon dy komunat në fjalë, informojnë se nga dita në ditë vazhdon rritja e numrit të pacientëve që kanë probleme serioze me gripin dhe virozat sezonale. Vetëm në javën e parë pas vitit të ri janë regjistruar gjithsej 180 pacientë të sëmurë me grip sezonal, edhe atë kryesisht të rinj. Këtë e deklaroi epidemiologia Jovanka Sturlakova-Koroveshovska nga Ohri e cila potencoi se në Dibër dhe Qendër Zhupë, vazhdon prezenca e virozave dhe gripit sezonale. Po ashtu ajo thotë se kontaktet me mjekët amë janë të përditshme dhe ndiqet tërësisht situata e pacientëve të sëmurë.
“Sidomos bie në sy prezenca e virusit të gripit sezonal tek fëmijët dhe të rinjtë. Sa i takon gjeneratës së tretë, sidomos ata të cilët kanë pranuar vaksinën, numri i të sëmurëve është i pritshëm, por prezenca e pacientëve të rinj dhe fëmijëve shqetëson”, ka deklaruar ajo. Për fat të mirë, shton Koroveshovska, deri tani nuk kemi patur pacientë me pasoja të rënda. Enti për Shëndet Publik në kontinuitet është duke ndjekur situatën me gripin sezonal dhe apelon që të gjithë pacientët që kanë simptoma të virusit, të paraqiten menjëherë tek mjekët amë.
Në lidhje me virozat sezonale dhe gripin sezonal, Koroveshovska thotë se shqetëson numri i pacientëve me grip tek fëmijët. Ajo thotë se problemi qëndron tek mos vaksinimi i fëmijëve nga ana e prindërve. “Ne si punëtorë shëndetësor gjithmonë apelojmë që prindërit janë të detyruar të vaksinojnë fëmijët e tyre në kohë. Shpeshherë ndodh që prindërit, duke mos ditur pasojat të mos vaksinimit, të sjellin vendime që të mos i vaksinojnë fëmijët. Këto janë vendime të gabueshme”, thotë ajo dhe potencon se, prandaj nga virozat në shënjestër janë edhe fëmijët të pavaksinuar. Vaksinat gjithmonë janë të sigurta dhe për të garantojnë institucionet shëndetësore.
Sipas Entit në fjalë, ka ndikim edhe migrimi i popullatës nga vendi në shtete të tjera dhe mos vaksinimi i fëmijëve gjatë emigrimit. Prandaj ata që emigrojnë duhet të vazhdojnë vaksinimet në shtetet ku jetojnë ose kur kthehen në vendlindje.
