Pas formimit të Qeverisë së re, institucionet e Maqedonisë së Veriut kanë filluar të publikojnë numër rekord të shpalljeve për punësime, duke reflektuar një dinamikë të re në administratën shtetërore. Vetëm në javët e fundit, dhjetëra konkurse janë hapur në ministri, agjenci dhe ndërmarrje publike.
Kjo valë punësimesh vjen në linjë me paralajmërimet e mëhershme nga përfaqësuesit e koalicionit VLEN, të cilët që në fillim të negociatave për formimin e Qeverisë kishin bërë të ditur se do të ketë mbi 2 mijë punësime të reja vetëm për shqiptarët në nivel republikan, si pjesë e barazimit etnik në administratë dhe përmirësimit të përfaqësimit të drejtë dhe adekuat.
Burime nga institucionet shtetërore bëjnë të ditur se pritet që kjo prirje të vazhdojë edhe në muajt e ardhshëm, ndërsa pjesa më e madhe e konkurseve do të jetë e hapur edhe për të rinjtë e sapodiplomuar, si dhe për kuadro me përvojë që kanë mbetur jashtë sistemit për shkak të mungesës së vullnetit politik ndër vite.
Kjo qasje e re është parë edhe si sinjal se Qeveria e re është e përkushtuar ndaj korrigjimit të padrejtësive të së kaluarës dhe krijimit të një administrate më gjithëpërfshirëse dhe më funksionale.
