Maturantët janë njohur edhe me infrastrukturën, kampusin universitar, konviktet dhe kabinetet që ofron ky universitet
Urim HASIPI
Tetovë, 10 maj – Universiteti i Evropës Juglindore në Tetovë ka hapur dyert për maturantët e shkollave të mesme. Këta maturantë kishin mundësi të njihen me fakultetet e këtij universiteti dhe të ofertën akademike. Këtë vit, fakultetet para maturantëve i prezantuan studentët dhe parlamenti studentor së bashku me profesorët e tyre, tha mes tjerash rektori i Universitetit të Evropës Juglindore në Tetovë, Abdylmenaf Bexheti. Ai theksoi se janë pikërisht studentët që studiojnë në këtë universitet munden më së miri t`ju tregojnë maturantëve për përparësitë që jep ky universitet. “Këtë vit kemi edhe fakultetin e shtatë, pra fakultetin e shkencave teknike, pas fakultetit të gjashtë pra të shkencave mjekësore. Pra, të gjithë këta do t`i ofrojnë programet e tyre të caktuara, ofertat e reja akademike dhe risitë në të cilët duhet të studiohet, përfshirë këtu edhe aspektet gjuhësore. Pra, universiteti mbetet i përkushtuar tre gjuhësorë, me dominim dhe strukturë të stabilizuar të studentëve”, tha rektori i UEJL-së, Abdylmenaf Bexheti.
Nga Universiteti i Evropës Juglindore në Tetovë bëjnë të ditur se ka një tendencë të rritjes të interesimit për studime në gjuhën angleze nga studentë ndërkombëtarë. Pjesa më e madhe janë studentë që studiojnë në gjuhën shqipe, thotë rektori Bexheti.
“Nëse i referohemi 5 ose gjashtë viteve më pas do të shohim se kemi një strukturë multietnike, ku dominojnë studentë që studiojnë pastër në gjuhën shqipe, 20 për qind që studiojnë në gjuhën angleze nga e para dhe 10 për qind që studiojnë në gjuhën maqedonase. Kjo strukturë përfshinë edhe studentët ndërkombëtarë dhe kemi një tendencë të rritjes të interesimit për studim në gjuhën angleze”, deklaroi rektori Bexheti.
Më tej, maturantët janë njohur edhe me infrastrukturën, kampusin universitar,konviktet dhe kabinetet që ofron ky universitet. Sipas rektorit, krahas kësaj, poashtu janë prezantuar edhe bursat që ofrohen nga ky universitet. “Sot do të shpjegohen edhe beneficionet që mund të përfitojnë si ato të bursave studentore që janë të tre kategorive të ndryshme por njëkohësisht edhe të njihen me kushtet infrastrukturore, teknike, organizative por edhe stafin e fakultetit ose me stafin përkatës të secilit program studimor”, nënvizoi Abdylmenaf Bexheti.
Gjatë tërë kohës ka patur shumë maturantë që kanë ardhur në mënyrë të organizuar për të parë ofertën akademike të këtij universiteti, kryesisht bëhet fjalë për nxënës të shkollave të mesme të Maqedonisë Perëndimore dhe jo vetëm. Në kuadër të aktivitetit “Open Day” Fakulteti i Biznesit dhe Ekonomisë organizoi “Gara për Biznes Planin më të mirë”. (koha.mk)
