Flaka Ymeri, sociologu në “Rubin Hud” ka folur edhe për ndikimin e rrjeteve sociale jo vetëm tek adoleshentët, por edhe te familjet, përcjell Nistori.
Ymeri shtoi se shpesh herë publikimet që bëhen në rrjete sociale, në të ardhmen, kur personat të kenë krijuar familje, bëhen burim i problemeve.
“Ne nuk kemi kompetenca që të bëjmë censurë apo të mbyllim këto rrjete sociale, mirëpo do të kemi pasoja me shëndetin mendor që do të vihen re pas disa viteve. Kur këta persona mund të rriten, videot mbesin dhe mund të keqpërdoren pas shumë viteve sikur kemi edhe raste të shumta ku shpesh herë janë keqpërdorur pas disa viteve, që dikujt i ka kushtuar edhe me prishje të familjes”, vlerëson Ymeri.
Sipas Ymerit, rrjetet sociale, veçanërisht “Snap chat” dhe “Tik Tok” janë bërë mollë sherri dhe burim i konflikteve mes adoleshentëve. Këto konflikte, shpesh herë kanë kaluar edhe në përleshje fizike.
Megjithatë, sociologia thotë se pasojat janë edhe më të mëdha. Ajo tregon se personalisht, gjatë punës së saj, ka hasur në raste edhe të abuzimit të të miturve dhe adoleshentëve nga persona të rritur, pikërisht në këto rrjete sociale.
“Kur ata po atakojnë me personalitete të ndryshme që i përkasin moshës së tyre, sigurisht se konflikti është i gatshëm. Por, pas saj qëndron sepse shpesh herë ata kanë takime të shpeshta në rrjete sociale me grupmosha të ndryshme ku edhe po abuzohen nga kjo grupmoshë e rritur këta fëmijë. Ne jemi dëshmitarë, shpesh herë të “live”-ve të tilla ku unë shpesh herë kam hasur në abuzimin e të miturve dhe adoleshentëve”, shtoi Ymeri.
