Shefi i inteligjencës ushtarake izraelite, gjeneralmajor Aharon Haliva vendosi të japë dorëheqje për shkak të dështimit të tij që çoi në sulmet e 7 tetorit, transmeton Anadolu.
Sipas deklaratës së ushtrisë izraelite, gjeneralmajor Haliva i ka dorëzuar letrën e dorëheqjes shefit të Shtabit të Përgjithshëm, Herzi Halevi.
Në letrën e tij të dorëheqjes, Haliva tha: “Njësiti i inteligjencës nën komandën time nuk arriti të përmbushë misionin e saj. Unë do ta mbaj dhimbjen e luftës përgjithmonë. Tani dua të pranoj përgjegjësinë dhe t’i jap fund detyrës sime”.
Nuk dihet ende se kur do të hyjë në fuqi dorëheqja e Haliva-s, pasi duhet të caktohet zëvendësuesi i tij në ushtrinë izraelite. Haliva u bë figura e parë e lartë ushtarake që pranoi dështimin e tij dhe vendosi të jepte dorëheqje pas sulmeve të 7 tetorit.
Raportohet se ushtria izraelite udhëzoi komandat për të nisur një hetim brenda ushtrisë në lidhje me dështimet që çuan në sulmet e 7 tetorit.
Në deklaratën me shkrim të ushtrisë izraelite në fillim të marsit, u vu re se do të zhvillohen hetime të brendshme ndaj njësive ushtarake që nuk ishin në dijeni të përgatitjeve për sulmin e 7 tetorit 2023 nga krahu ushtarak i Hamasit, Brigadat Izzeddin al-Qassam ose që mendohet se nuk kanë marrë masa paraprake të mjaftueshme para sulmit.
Thuhet se hetimet do të fokusoheshin në dështimet operacionale brenda ushtrisë gjatë periudhës 5-vjeçare nga marsi 2018 deri më 10 tetor 2023.
