Presidenti i Shteteve të Bashkuara të Amerikës, Joe Biden, dhe homologu i tij ukrainas, Volodymyr Zelensky kanë nënshkruar një marrëveshje dypalëshe të sigurisë.
Ky pakt 10-vjeçar po shihet si pararendës për anëtarësimin e Ukrainës në NATO, raportoi BBC-ja.
Marrëveshja thotë se në rast të një sulmi të armatosur kundër Ukrainës, SHBA-ja dhe Ukraina do të takohen brenda 24 orëve për të diskutuar për përgjigje, por se nuk e angazhon SHBA-në të dërgojë forca për ta mbrojtur Ukrainën.
“Çdo agresion ose kërcënim agresioni kundër sovranitetit, pavarësisë dhe integritetit territorial të secilës Palë në të ardhmen, do të jetë çështje shqetësimi serioz për Palën tjetër”, thuhet në marrëveshje.
Në të theksohet se SHBA-ja do ta mbështesë Ukrainën në zhvillimin e forcës së saj ushtarake përmes trajnimit, planifikimit të përbashkët dhe përpjekjeve për sigurinë kibernetike.
“Palët janë të gatshme të ndajnë informacionin dhe inteligjencën e disponueshme dhe të përshtatshme menjëherë në përgjigje të një ngjarjeje dhe të konsultohen me vendet nënshkruese të Deklaratës së Përbashkët të 2023”, thuhet më tej në marrëveshje.
Ukraina gjithashtu do të ndihmohet që të kërkojë kompensim për dëmin e shkaktuar nga Rusia.
Gjatë konferencës së përbashkët me Bidenin, Zelensky ka thënë se i ka kërkuar SHBA-së një sistem të fuqishëm raketor tokë-ajër, të cilin ai e sheh si kyç për të luftuar kundër Rusisë.
SHBA i ka dërguar Ukrainës një sistem Patriot dhe do t’i dërgojë edhe një tjetër, megjithatë ukrainasit duan më shumë.
“Na duhen urgjentisht shtatë sisteme Patriot”, ka thënë Zelenksy. “Ne shohim në të ardhmen e afërt rezultat të mirë për Ukrainën”, ka shtuar ai.
Ndërsa Bideni ka thënë se Ukraina do t’i ketë disa prej tyre “shumë shpejt”.
Marrëveshja mes dy vendeve përfshin edhe avionë luftarakë F-16 dhe armë të tjera që Ukraina ka kërkuar prej kohësh.
