Studiuesit nga Shoqëria e Pyjeve të Lashta në Parkun Kombëtar Sequoia, Kaliforni, janë duke kërkuar për prova të një kërcënimi në rritje ndaj pemëve madhështore sekuja: brumbujt e lëvores.
Pas inspektimit të kujdesshëm dhe zbritjes së pemës së lartë 2200-vjeçare, ka një lajm të mirë: është gjetur pak aktivitet i brumbujve, dhe kjo i ka gëzuar studiuesit.
“Kur u ngjitëm lart, nuk e dinim se çfarë niveli i aktivitetit të brumbullit do të ishte në pemën e gjeneralit Sherman. Ne gjetëm pak aktivitet, por në përgjithësi, duket se është një pemë shumë e shëndetshme që është në gjendje të mbrohet nga çdo sulm brumbulli”, ka deklaruar Anthony Ambrose, drejtor i “Ancient Forest”, njëherësh kryesues i ekspeditës së ngjitjes.
Është hera e parë që alpinistët ngjiten në pemën ikonë 85 metra, e cila tërheq turistë nga e gjithë bota në Parkun Kombëtar Sequoia.
Studiuesit po shqetësohen gjithnjë e më shumë për brumbujt e lëvores, të cilët nuk përbënin një kërcënim serioz në të kaluarën.
Shkencëtarët thonë se kanë zbuluar rreth 40 pemë sekuoja që janë vyshkur nga infektimet e brumbujve, kryesisht brenda parqeve kombëtare. Nëse lihen të pakontrolluar, brumbujt e vegjël mund të vrasin një pemë brenda gjashtë muajve.
“Ne po dokumentojmë disa pemë që në të vërtetë po vdesin nga një lloj kombinimi i thatësirës dhe zjarrit që i kanë dobësuar ato në një pikë ku ato nuk janë në gjendje të mbrohen nga sulmi i brumbujve”, ka shtuar Ambrose.
Sekuiat gjigante, gjallesat më të mëdha të Tokës, kanë mbijetuar për mijëra vjet në vargmalin perëndimor të Sierra Nevada të Kalifornisë, i vetmi vend ku speciet janë vendase.
Por ndërsa klima bëhet më e nxehtë dhe më e thatë, sekuiat gjigante që më parë mendohej se ishin pothuajse të pathyeshme, po kërcënohen gjithnjë e më shumë nga nxehtësia ekstreme, thatësira dhe zjarret.
