Muzikanti dhe kompozitori turk, Omar Faruk Tekbilek, tha se gjatë gjithë jetës së tij artistike është frymëzuar nga shumë muzikantë.
Tekbilek, së bashku me “His Ensemble With String Quartet” do të zhvillojë koncert më 1 dhjetor në Qendrën Kulturore Atatürk (AKM) dhe më 3 dhjetor në CSO Ada Ankara.
Tekbilek, i cili mund të përdorë shumë instrumente si baglama, nej, darabukë, zurna dhe def në nivelin e virtuozit, ndërthur kultura të ndryshme duke ndërtuar një urë midis muzikës tradicionale turke dhe muzikës botërore.
Në një intervistë për Anadolu, Tekbilek foli për jetën e tij artistike si dhe koncertet që do t’i mbajë në Türkiye.
– “Çdokush mund ta bëjë atë që dëshiron me muzikën instrumentale duke imagjinuar fjalët që dëshiron”
Duke treguar se puna me muzikantin Brian Keane ka ndikuar në artin e tij, Tekbilek tha se së bashkë fillimisht kanë nxjerrë albumin “Suleiman the Magnificent”.
Duke theksuar se këtë album e kanë bërë për një dokumentar rreth jetës së Sulejmanit të Madhërishëm dhe për një ekspozitë, ai tha:
“Përgatitja e muzikës së vendeve të ndryshme që kërkonte ky film, na ndihmoi të kuptojmë se ana e përbashkët universale e muzikës është katër lloje. E pamë që gjëja e parë e këtij diversiteti është muzika shpirtërore, e dyta muzika romantike, e treta muzika folklorike dhe e katërta muzika popullore. Ne arritëm të njëjtin interes dhe sukses duke përdorur gjithmonë të njëjtin format në punimet tona të mëtutjeshme”.
Që nga mosha e hershme ai ka kuptuar se muzika instrumentale është më efektive se sa ajo me tekst. “Unë besoj se muzika me tekst i tërheq vetëm ata që e flasin atë gjuhë, ndërsa kjo kufizon dimensionin universal të muzikës. Ndërkaq, çdokush mund ta bëjë atë që dëshiron me muzikën instrumentale duke imagjinuar fjalët që dëshiron”, tha ai.
– “Muzika turke është muzika më e pasur në botë për nga melodia dhe ritmi”
Më tej, Tekbilek, duke shpjeguar se shumë “mjeshtër të muzikës” në jetën e tij artistike zënë një vend të rëndësishëm, mes tyre ai numëroi Aka Gündüz Kutbay, Burhan Tonguç, İsmet Sıral si dhe shumë mjeshtër muzikantë amerikanë të xhazit, duke dalluar emrat Orhan Gencebay dhe Briane Keane.
Duke folur për rëndësinë e muzikës turke, Tekbilek tha: “Meqenëse muzika jonë u shfaq në një gjeografi që ka qenë djepi i dhjetëra qytetërimeve gjatë historisë, ajo është muzika më e pasur në botë për nga melodia dhe ritmi, edhe pse është monofonike”.
Ai foli edhe për koncertet që do t’i mbajë në Istanbul dhe Ankara. Tekbilek informoi se koncerti i parë do të jetë në Istanbul më 1 dhjetor në Istanbul AKM, ndërsa i dyti më 3 dhjetor në CSO ADA Ankara.
“Ajo që më emocionon gjithashtu është takimi me njerëzit e vendit tim të dashur, që më mungon, në hyrje të sallave pas çdo dy koncertesh”, u shpreh Tekbilek.
Tekbilek tashmë 45 vjet jeton në SHBA së bashku me fëmijët dhe nipat/mbesat e tij, ndërsa një kohë të caktuar punon në atdheun e tij Adana. “Që tani e tutje synoj të ndaj më shumë nga ajo që kam grumbulluar në jetën time artistike, veçanërisht me të rinjtë e vendit tim”, shtoi muzikanti dhe kompozitori turk Tekbilek.
