Më shumë se 2,500 protesta janë planifikuar të zhvillohen të shtunën në 50 shtetet amerikane, një mobilizim masiv kundër politikave të presidentit Donald Trump mbi imigracionin, arsimin dhe sigurinë, të cilat organizatorët thonë se po e shtyjnë vendin drejt autokracisë.
Marshi “Pa Mbretër” vjen pas demonstratave të ngjashme në qershor. Që kur Trump mori detyrën 10 muaj më parë, administrata e tij ka rritur zbatimin e ligjit për imigracionin, ka ndërmarrë hapa për të ulur fuqinë punëtore federale dhe për të shkurtuar fondet për universitetet elitare, diversitetin në kampus dhe politikat transgjinore.
Guvernatorët republikanë në disa shtete amerikane kanë vënë trupat e Gardës Kombëtare në gatishmëri në përgatitje të protestave mbarëkombëtare. Aleatët e Trumpit kanë akuzuar protestuesit se janë aleatë me lëvizjen e ekstremit të majtë Antifa.
Organizatorët thanë se në protestën e fundit “Pa Mbretër”, të mbajtur në qershor, më shumë se pesë milionë njerëz dolën në rrugë për të denoncuar agjendën politike të Trumpit.
“Nuk ka asgjë më amerikane sesa të thuash ‘nuk kemi mbretër’ dhe të ushtrosh të drejtën për të protestuar në mënyrë paqësore”, tha Leah Greenberg, bashkëthemeluese e “Indivisible”, një organizatë progresive që është organizatorja kryesore e marshimeve “Pa Mbretër”.
