Kryetari i VMRO-DPMNE-së, Hristijan Mickoski, pohon se disa parti para zgjedhjeve kanë dashur që t’i bashkëngjiten koalicionit me VMRO-DPMNE-në. Edhe pse nuk tregoi se cilat janë ato parti, pohon se janë pjesë e shumicës parlamentare. Thotë se nga këto parti së pari pritet që ta pranojnë programin dhe platformën e partisë.
“Ka, ka sinjale, shumë nga partitë që tani janë në pushtet, që kanë qenë në pushtet tregojnë sinjale që t’i bashkëngjiten VMRO-DPMNE-së. Ne kemi bërë komision, ashtu është procedura dhe në periudhën që vijon ai komision do të ketë takime me të gjithë partitë politike në Maqedoni. Presim që ta pranojnë programin dhe platformën që e ofron VMRO-DPMNE.”- deklaroi Hristijan Mickoski, kryetar i VMRO-DPMNE-së.
Në lidhje me takimin e paralajmëruar me kryeministrin Kovaçevski rreth zgjedhjeve dhe Qeverisë teknike, tha se këtë mund ta bëjnë edhe me bisedë telefonike.
“Deri më tani nuk kemi caktuar takim, në periudhën që vjen, do të shohim, këtë mundemi edhe përmes telefonit ta zgjidhim, nuk është patjetër çdoherë takimi të jetë mjet përmes së cilit bisedohet.”- tha Hristijan Mickoski, kryetarë i VMRO-DPMNE-së.
I pyetur në lidhje me atë se kush do të jetë kandidati për president, tha se kjo do të dihet në pjesën e dytë të muajit shkurt, ndërsa besimi do t’i jepet atij që ka mbështetje më të madhe sipas anketave brenda partisë, e më pas në Konventën e delegatëve do të zgjidhet kandidati.
