Ali Ahmeti po i çon njerëz VMRO DPMNE-së duke u lutur që të bëhet pjesë e koalicionit të ardhshëm qeveritar pa kushte, tha sot kreu i kësaj partie, Hristijan Mickoski.
“Më vjen keq që Ali Ahmeti dëshiron të paraqitet në publik si ideolog dhe shumë i fortë dhe në prapavijë na dërgon emisarë dhe dëshiron pa kushte të hyjë në një koalicion të ardhshëm me VMRO-DPMNE-në. Më vjen keq që Ali Ahmeti e rrethoi veten me njerëz të cilët po ashtu e keqpërdorin për të bërë krim dhe grabitje të Maqedonisë, dhe më vjen keq që Ali Ahmeti duke u rrethuar me këta njerëz, në vend që të perfundoje si pensionist politik dhe te ishte ideolog, ai do të përfundojë si bashkëpunëtor në krimin e bashkëpunëtorëve të tij të afërt të cilët së shpejti nga sot do të jenë dëshmitarë opinion, të gjithë qytetarët në Maqedoni pa dallim etnie, për çka kemi një numër të madh të dëshmive”, thotë Mickoski.
Por, Mickoski thotë se qeverinë e ardhshme do ta bëjë me opozitën shqiptare VLEN.
“Populli foli, koalicionin e ardhshëm do ta bëjë VMRO DPMNE, ndërsa pjesë e saj do të jetë koalicioni që në këto zgjedhje mori pjesë me emrin VLEN”, tha Mickoski.
Sipas tij, opozita tek maqedonasit dhe shqiptarët morën rreth 450 mijë vota në zgjedhjet presidenciale, ndërsa pushteti LSDM dhe BDI vetëm 300 mijë.
“Nëse analizoni rezultatin e zgjedhjeve do të arrini në përfundimin e mëposhtëm, se kandidatët e qeverisë Stevo Pendarovski dhe Bujar Osmani kanë fituar gjithsej 300 mijë vota. Nëse shikoni rezultatin e vendosur nga qytetarët, i cili është rezultat i kryetares së ardhshme Gordana Siljanovska-Davkova dhe kryetarit të komunës së Gostivarit, Arben Taravari, është afër 450.000 vota, që do të thotë një herë e gjysmë më shumë”, tha Mickoski.
