Trajneri i Paris Saint-Germain, Luis Enrique nuk e fshehu emocionin e tij pas ndeshjes së dytë gjysmëfinale ndaj Arsenalit, ku fituan 2-1 dhe kaluan në finalen e Ligës së Kampionëve falë rezultatit përfundimtar 3-1, ku do të takohen me Interin.
Enrique është gati të luajë në finalen e tij të dytë të Ligës së Kampionëve pas fitores triumfit me Barcelonën para dhjetë vitesh, dhe vlerësoi punën e të gjithë ekipit dhe kujtoi momentet e vështira.
“Shumë emocione! Arsenali luajti shumë mirë. Na u desh të mbroheshim, por patëm mundësinë të bënim disa kundërsulme shumë të vështira. Nuk ishte ndeshja që donim”, ka thënë fillimisht Enrique pas ndeshjes.
“Na u desh të bënim një përpjekje shtesë për të gjetur zgjidhje; ishte e vështirë. Por patëm disa raste shumë të pastra. Por, pjesa e parë ishte një luftë për mua”.
“Po përpiqemi të ndërtojmë besim. Kur një lojtar sheh se loja nuk është normale, është një moment kur mendon se duhet të tërhiqesh për t’u mbrojtur. Por është e kundërta; duhet të bësh presion. Por pjesa e parë ishte e vështirë. Ne vuajtëm”.
“Një kundërshtar si Arsenali, që luan shumë mirë me ose pa top, i vështirëson gjërat për ty. Ne luajtëm një pjesë të parë që nuk e donim, por pjesa e dytë ishte më konkurruese. Goli na dha qetësi shpirtërore”.
“Në fazën e grupeve, ne meritonim nëntë pikë më shumë, pa dyshim, por të pasurit e një grupi kaq të fortë dhe kompleks e ndihmoi ekipin të rritej. Mendoj se gjatë atyre momenteve, statistikat ishin ndër më të mirat në Evropë, pa efektivitet, dhe kur gjërat u rikthyen në rrugën e duhur, mendoj se treguam se e meritonim të ishim në finale”.
“I lumtur te PSG? Ndihem shumë rehat sepse, me Luis Campos dhe presidentin, kam aftësinë të projektoj një ekip që tifozët do ta duan. Është koha të tregoj mbështetjen e njerëzve që e duan PSG-në dhe që na kanë ndihmuar gjatë gjithë kohës”.
“Objektivi? Mendoj se ky klub meriton të fitojë Ligën e Kampionëve për të gjithë përpjekjen që ka bërë, dhe tifozët e meritojnë këtë për një kohë të gjatë. Do të përpiqemi këtë vit dhe në vitet që vijnë”.
Në fund Enrique u pyet nëse ajo që thotë Arteta është e vërtetë, teksa nuk hezitoi të përgjigjej.
“Nuk pajtohem. Arteta është një mik i shkëlqyer, por nuk pajtohem. Ata luajtën ashtu siç donin, por në të dyja ndeshjet ne shënuam më shumë gola se ata. Duhet të them se na bënë të vuajmë, dhe kjo është ndeshja në të cilën vuajtëm më shumë, por e meritonim të kalonim tutje”, përfundoi trajneri i PSG-së.
