Kryetari i Kuvendit, Afrim Gashi, ka pritur në një takim zyrtar Presidentin e Republikës së Shqipërisë, Bajram Begaj, duke theksuar marrëdhëniet e shkëlqyera dhe partneritetin strategjik ndërmjet dy vendeve.
“Kënaqësi e veçantë të mirëpres në Kuvend, Presidentin e Republikës së Shqipërisë, mikun tim, z. Bajram Begaj”, ka shkruar Gashi.
Sipas tij, takimi është zhvilluar “në një frymë vëllazërore”, ku është konfirmuar niveli i lartë i bashkëpunimit dypalësh.
“Konfirmuam marrëdhëniet e shkëlqyera ndërmjet dy vendeve tona, të cilat karakterizohen nga dialog intensiv politik dhe bashkëpunim të qëndrueshëm”, theksoi ai.
Gashi ka përgëzuar Shqipërinë për progresin në integrimin evropian dhe ka riafirmuar angazhimin e përbashkët për anëtarësim në Bashkimin Evropian.
“Shpreha përgëzime për progresin e Shqipërisë në rrugën drejt Bashkimit Europian dhe riafirmova përkushtimin tonë të përbashkët për të avancuar në procesin e integrimit, si fqinjë dhe aleatë në NATO”, thuhet në njoftim.
Në fokus të bisedimeve ishte edhe bashkëpunimi ekonomik dhe infrastrukturor, me theks të veçantë te projektet strategjike.
“Theksuam rëndësinë e thellimit të bashkëpunimit ekonomik dhe infrastrukturor, veçanërisht realizimin e projekteve si Korridori 8, që përbën një element jetik të partneritetit dhe lidhjeve tona”, deklaroi kryeparlamentari.
Ai nënvizoi gjithashtu rolin e shqiptarëve si faktor lidhës mes dy shteteve.
“Konstatuam rolin e pazëvendësueshëm të shqiptarëve si urë lidhëse mes shteteve tona, ndaj partneriteti strategjik do të vijojë të forcohet në frymën e miqësisë, besimit dhe vizionit të përbashkët europian”, përfundoi Gashi.
