Anëtarësimi i Kosovës në Këshillin e Evropës dhe rruga drejt integrimit në BE kanë qenë temë diskutimi në takimin që kryeministri Albin Kurti ka zhvilluar me homologun kroat, Andrej Pllenkoviq, në margjinat e Forumit të Davosit. E presidenti i Serbisë iu ankua emisarit evropian për dialogun Kosovë-Serbi, Miroslav Lajçak, se të arriturat në dialogun e Brukselit po rrezikohen shkaku i politikave të Kurtit
Mbështetje për anëtarësim në Këshillin e Evropës dhe për integrim drejt Bashkimit Evropian i ka ofruar kryeministri i Kroacisë, Andrej Plenkoviq, homologut të tij kosovar, Albin Kurti, në margjinat e Forumit Ekonomik Botëror në Davos të Zvicrës.
Në një postim në platformën X, Plenkoviq ka shkruar se me Kurtin kanë biseduar edhe për situatën në rajon.
“Me kryeministrin e Kosovës, Albin Kurti, diskutova për situatën në rajon. E përgëzova për heqjen e regjimit të vizave, si dhe i shpreha mbështetjen tonë për anëtarësimin në Këshillin e Evropës dhe në rrugën drejt BE-së”, ka shkruar Plenkoviq.
Para Plenkoviqit, Kurti të martën ka takuar edhe ndihmëssekretarin amerikan për Evropë dhe Euroazi, James O’Brien.
Sipas Kurtit, O’Brieni ka shprehur vlerësimin për përparimin demokratik të Kosovës dhe për përmbajtjen karshi sulmeve e provokimeve.
“Një kënaqësi të takohem në Davos me ndihmëssekretarin O’Brien. Ai shprehu vlerësimin për përparimin ekonomik dhe demokratik të Kosovës dhe njohu se u treguam të përmbajtur përballë sulmeve dhe provokimeve. SHBA-ja është mike dhe aleate e çmuar. Ne presim bashkëpunim të vazhdueshëm”, ka shkruar Kurti.
E presidenti i Serbisë, Aleksandar Vuçiq, iu ankua emisarit evropian për dialogun Kosovë-Serbi, Miroslav Lajçak, se kryeministri Kurti po i rrezikon të arriturat në këtë proces.
“Kurti po kërkon ta pengojë pagesën e rrogave dhe pensioneve për popullin tonë, që do të nënkuptonte jo një largim të heshtur, por të zëshëm të serbëve nga Kosova. Kërkoj mbështetje jo për Serbinë, por për njerëzit e thjeshtë në Kosovë, që t’u mundësohet të vazhdojnë të jetojnë në shtëpitë dhe territorin e tyre, në përputhje me parimet e vitit 2015, por edhe në pajtim me planin e ri për Asociacionin të miratuar nga BE-ja. Nëse dikush dëshiron ta shkatërrojë edhe atë, ajo që na mbetet është kërcënimi më serioz dhe më i madh deri më tash për dialogun”, ka thënë Vuçiq.
Forumi në Davos të Zvicrës ka nisur të hënën mbrëma dhe mbyllet të premten.
