Presidenti i Polonisë, Karol Nawrocki, sot ka urdhëruar kthimin e avionit me të cilin po udhëtonte drejt Senegalit, pasi është informuar se policia kishte hyrë në ambientet e Gjykatës Kushtetuese në Poloni dhe se kryetari i saj ishte pezulluar nga detyra.
“Në një moment të tillë, presidenti duhet të jetë në Poloni. Po e ndërpres vizitën në Senegal dhe po kthehem”, ka shkruar Nawrocki në rrjetin social X.
Policia njoftoi se zyrtarët e saj kishin hyrë në ambientet e Gjykatës Kushtetuese pas incidenteve para ndërtesës, ku ndaj policëve ishin hedhur edhe sende të rrezikshme. Ndërkohë, Gjykata Kushtetuese njoftoi në faqen e saj zyrtare se kryetari i saj, Bogdan Święczkowski, ishte pezulluar të premten.
Qytetarët mblidhen para Gjykatës Kushtetuese
Polonia po përballet me një përplasje të thellë politike dhe institucionale mes dy kampeve kryesore.
Në njërën anë është kryeministri Donald Tusk, ndërsa në anën tjetër presidenti Karol Nawrocki, i cili është politikisht i afërt me partinë opozitare Ligj dhe Drejtësi, që qeverisi vendin nga viti 2015 deri në vitin 2023.
Mosmarrëveshjet lidhen me atë se kush ka legjitimitetin për emërimin e gjyqtarëve dhe kontrollin mbi funksionimin e Gjykatës Kushtetuese.
Qeveria e Tuskut pretendon se pushteti i mëparshëm e kishte politizuar sistemin gjyqësor dhe se nevojitet rikthimi i sundimit të ligjit. Nga ana tjetër, PiS dhe presidenti akuzojnë qeverinë se po shkel rregullat institucionale.
Pse hyri policia në Gjykatën Kushtetuese?
Më 30 tetor, policia hyri në ambientet e Gjykatës Kushtetuese në Varshavë, ndërsa kryetari i saj, Bogdan Święczkowski, u pezullua nga detyra.
Ministri i Drejtësisë kërkoi heqjen e imunitetit të tij dhe të zëvendësit të tij. Ndërkohë, mbështetës të partisë PiS u mblodhën para gjykatës, ku pati edhe përplasje me policinë.
Vetë Gjykata Kushtetuese e cilësoi këtë veprim si “grusht shteti”, ndërsa kryeministri Tusk e mbrojti si hap të domosdoshëm për rikthimin e rendit juridik.
Presidenti Nawrocki ishte rrugës për në Senegal, por pas zhvillimeve në Varshavë vendosi ta ndërpresë vizitën dhe të kthehet në Poloni.
